- సిద్దిపేట జిల్లా వర్గల్ మండలం అంబార్పేటలో ఘటన
గజ్వేల్/వర్గల్, వెలుగు: ప్రేమించిన అమ్మాయికి పెళ్లవుతోందని, ఆమె కుటుంబీకులు దాడి చేసి కొట్టారనే మనస్తాపంతో సిద్దిపేట జిల్లా వర్గల్ మండలం అంబార్పేటకు చెందిన ఓ యువకుడు గడ్డి మందు తాగి ఆత్మహత్య చేసుకున్నాడు. గౌరారం ఎస్సై కరుణాకర్రెడ్డి తెలిపిన వివరాల ప్రకారం.. గ్రామానికి చెందిన గంగెల్ల పవన్ కల్యాణ్(20) ఇదే మండలం మల్లారెడ్డిపల్లి గ్రామానికి చెందిన యువతి(19) మూడేండ్లుగా ప్రేమించుకుంటున్నారు.
వారిద్దరి కులాలు వేరు కావడంతో అమ్మాయి కుటుంబసభ్యులతో అబ్బాయికి గొడవ జరిగింది. ఇటీవల అమ్మాయికి ఆమె కుటుంబ సభ్యులు పెళ్లి చేయాలని నిర్ణయించగా, విషయం తెలుసుకున్న పవన్ ఈ నెల 18న అమ్మాయి ఇంటికి వెళ్లాడు. అక్కడ అతడిపై అమ్మాయి కుటుంబీకులు దాడి చేశారు. దీంతో ప్రేమించిన అమ్మాయికి వేరే వ్యక్తితో పెళ్లవుతోందని, ఆమె కుటుంబ సభ్యులు తనను కొట్టారని మనస్తాపానికి గురైన పవన్ కల్యాణ్ అక్కడే కలుపు మందు తాగాడు.
అనంతరం తానే స్వయంగా గజ్వేల్ ప్రభుత్వ ఆసుపత్రికి వెళ్లాడు. ఆరోగ్యం కుదుటపడడంతో పవన్ను కుటుంబ సభ్యులు19న ఇంటికి తీసుకువచ్చారు. మరుసటి రోజు మళ్లీ అస్వస్థతకు గురవడంతో లక్ష్మక్కపల్లిలోని ఆర్వీఎం హాస్పిటల్కు, అక్కడి నుంచి హైదరాబాద్ గాంధీ ఆసుపత్రికి తీసుకెళ్లారు. అక్కడ చికిత్స పొందుతూ మంగళవారం చనిపోయాడు.
ఈ మేరకు కేసు నమోదు చేసి దర్యాప్తు చేస్తున్నట్లు ఎస్సై తెలిపారు. డీబీఎఫ్ జాతీయ కార్యదర్శి పి.శంకర్ మృతుడి కుటుంబాన్ని పరామర్శించి, పరువు హత్యగా కేసు నమోదు చేసి బాధిత కుటుంబానికి న్యాయం చేయాలని డిమాండ్ చేశారు.
