జూబ్లీహిల్స్, వెలుగు: యువతిని ప్రేమించి, పెళ్లి చేసుకుంటానని నమ్మించిన ఓ యువకుడు ఆమెతో బిడ్డను కన్నాక మొహం చాటేశాడు. పోలీసులు తెలిపిన వివరాల ప్రకారం.. వరంగల్ జిల్లా నర్సంపేటకు చెందిన బానోతు సురేందర్(29) ప్రైవేటు ఉద్యోగం చేస్తూ షేక్ పేటలోని మారుతి నగర్ లో నివసిస్తున్నాడు. ఫిలింనగర్లో నివసించే ఓ యువతితో పరిచయం కాగా ప్రేమిస్తున్నానని చెప్పాడు. ఎలాగైనా పెళ్లి చేసుకుంటానని నమ్మించాడు. కొన్ని రోజులు ఆమెతో సహజీవనం చేసి ఓ బిడ్డకు జన్మనిచ్చాడు.
యువతి పెళ్లి చేసుకుందామని సురేందర్ ను కోరగా కొంతకాలంగా సాకులు చెబుతూ తప్పించుకుంటున్నాడు. గట్టిగా నిలదీయడంతో మొహం చాటేశాడు. దీంతో బాధిత యువతి ఫిలింనగర్ పోలీస్ స్టేషన్లో ఫిర్యాదు చేయగా, కేసు నమోదు చేసి సురేందర్ ను రిమాండ్ కు తరలించినట్లు పోలీసులు తెలిపారు.
