ప్రజల పక్షాన నిలబడేందుకే పార్టీ పెట్టానని వైఎస్ఆర్టీపీ చీఫ్ వైఎస్ షర్మిల స్పష్టం చేశారు. మెదక్ జిల్లా నర్సాపూర్ నియోజక వర్గంలోని నర్సాపూర్ మండలం నట్నాయ్యపల్లి గ్రామంలో పర్యటించిన వైఎస్ షర్మిల... కొట్లాడక పోతే ఏదీ రాదని చెప్పారు. మాట్లాడక పోతే ఏ సమస్య తీరదన్న ఆమె... ఓటు అనేది మీ చేతిలో ఉన్న ఆయుధమని... మీ జీవితాలను మార్చే ఆయుధమన్నారు. వైఎస్సార్ ఏ పథకం పెట్టినా ప్రజల కోసమే పెట్టాడన్న షర్మిల.. అలాంటి వైఎస్సార్ నాయకత్వం మళ్ళీ రావాలని పిలుపునిచ్చారు.
ఈ కేసీఆర్ కో లేక బీజేపీకో, కాంగ్రెస్ కో ఓటేస్తే మీ జీవితం మారదని షర్మిల చెప్పారు. 8 ఏళ్లుగా కేసీఆర్ మోసం చేస్తే.. బీజేపీ, కాంగ్రెస్ కూడా ప్రజలకు చేసింది మోసమేనని ఆరోపించారు. కేసీఆర్ అరాచకాలపై ఏనాడూ ప్రతిపక్షాలు పోరాటం చేయలేదన్న షర్మిల... ఏ ఒక్క నాయకుడూ ప్రజల పక్షాన నిలబడింది లేదని విమర్శించారు. రుణమాఫీ జరగకపోతే ఎవరు కొట్లాడారు..? డబుల్ బెడ్ రూం ఇల్లులు ఇవ్వకపోతే ఎవరు కొట్లాడారు..?- ఉద్యోగాలు ఇవ్వక పోతే ఎవరు కొట్లాడారు..? అంటూ వైఎస్ షర్మిల ప్రశ్నల వర్షం కురిపిస్తూ... ఆగ్రహం వ్యక్తం చేశారు.
