ముంబై: చట్టసభల్లో రూల్స్ ఉల్లంఘించే సభ్యులకు రాజకీయ పార్టీలు మద్దతు ఇవ్వడం, వారి ప్రవర్తనను సమర్థించడం సరికాదని ప్రధాని నరేంద్ర మోదీ అన్నారు. శనివారం ముంబైలో జరిగిన 84వ ఆల్ ఇండియా ప్రిసైడింగ్ ఆఫీసర్స్ కాన్ఫరెన్స్ (ఏఐపీవోసీ)లో ఆయన వర్చువల్గా మాట్లాడారు. ‘‘ఒకప్పుడు సభలో ఎవరైనా సభ్యుడు రూల్స్ ఉల్లంఘించి, ఆయనపై చర్యలు తీసుకుంటే.. సీనియర్ సభ్యులు అతనికి వివరంగా చెప్పేవారు. దీంతో ఆ సభ్యుడు మరోసారి తప్పు చేయకుండా ఉండేవారు.
కానీ ప్రస్తుతం కొన్ని పార్టీలు రూల్స్ ఉల్లంఘించిన సభ్యులకు మద్దతు పలుకుతున్నాయి. తప్పులను సమర్థిస్తున్నాయి. ఈ పరిస్థితి పార్లమెంటు, శాసనసభలకు మంచిది కాదు” అని మోదీ అన్నారు. యువ ప్రజాప్రతినిధులకు సభా కమిటీలలో ఎక్కువ అవకాశాలు కల్పించాలన్నారు. ఇ–విధాన్, డిజిటల్ సంసద్ ద్వారా ‘ఒక దేశం, ఒకే లెజిస్లేటివ్ ప్లాట్ఫామ్’ అనే అంశంపై వర్క్ చేస్తున్నట్లు పేర్కొన్నారు.
