జీడిమెట్ల, వెలుగు:హైదరాబాద్ నగరంలో అలజడి రేపిన సూట్కేసులో యువతి డెడ్బాడీ కేసును ఎట్టకేలకు పోలీసులు చేధించారు. హత్యకు గురైన యువతితో పాటు హత్య చేసిన వ్యక్తిది కూడా నేపాలేనని పోలీసులు గుర్తించారు. కొన్ని రోజులుగా హైదరాబాద్లో ఇద్దరు సహజీవనం చేయగా.. మహిళకు ప్రెగ్నెన్సీ రావడంతో వారి మధ్య విభేదాలు తలెత్తడం వల్లే ఈ హత్య జరిగినట్టు తెలిసింది.
బాచుపల్లి పోలీస్ స్టేషన్ పరిధిలో ఈ దారుణ ఘటన జరగగా 24 గంటల్లోనే సీసీ కెమెరాల ఆధారంగా పోలీసులు కేసును చేధించారు. విశ్వసనీయ సమాచారం ప్రకారం.. హత్యకు పాల్పడిన విజయ్ తోపా(30) అనే యువకుడితోపాటు హత్యకు గురైన తారా బెహరా(33) అనే మహిళను నేపాల్కు చెందిన వారుగా గుర్తించారు. వీరిద్దరిది నేపాల్లోని పక్కపక్కన గ్రామాలేనని తెలిసింది. తారా బెహరాకు మరొకరితో వివాహమై ఇద్దరు పిల్లలు కూడా ఉన్నారు. కానీ విజయ్ తోపాతో కొంత కాలంగా వివాహేతర సంబంధం నడుస్తోంది. విజయ్తోపా హైదరాబాద్కు వచ్చి ఫాస్ట్ఫుడ్ సెంటర్లో చెఫ్గా పనిచేస్తున్నాడు. ఏప్రిల్లో తారా బెహరాను కూడా నేపాల్ నుంచి హైదరాబాద్కు తీసుకొచ్చాడు.
జూబ్లీహిల్స్ ప్రాంతంలో ఓ ఇంటిని అద్దెకు తీసుకుని సహజీవనం చేశాడు. అనంతరం తన మకాంను 40 రోజుల క్రితం భౌరంపేట్ ఇందిరమ్మ కాలనీకి మార్చాడు. ఇక్కడే ఓ అద్దె రూంలో తారా బెహరాతో సహజీవనం చేస్తూ ఓ ఫాస్ట్ఫుడ్సెంటర్లో పనిచేస్తున్నాడు. ఈ క్రమంలో ఆమెకు ప్రెగ్నెన్సీ రావడంతో ఇద్దరి మధ్య గొడవలు ప్రారంభమయ్యాయి. ప్రెగ్నెన్సీ ఉంచుకోవాలని ఒకరు, వద్దని మరొకరు గొడవ పడ్డారు. ఈ విషయంలో మే 23న రాత్రి ఇద్దరి మధ్య గొడవ పెద్దదైంది. విచక్షణ కోల్పోయిన విజయ్ తోపా ఆమె మెడకు నైలాన్ తాడు చుట్టి గొంతు నులిపి చంపేశాడు.
సూట్కేసుల షాపులో కెమెరాకు చిక్కి..
తారా బెహరాను హత్య చేసిన అనంతరం ఆమె శవాన్ని మాయం చేయాలని విజయ్ భావించాడు. ఇందుకోసం బాచుపల్లిలోని ఓ షాప్లో సూట్కేస్ కొనుగోలు చేసి అనంతరం ర్యాపిడో బుక్ చేసుకుని ఇంటికి వెళ్లాడు. సూట్కేస్లో మహిళ శవాన్ని ప్యాక్ చేసి బయటికి తీసుకెళ్లాడు.
బాచుపల్లిలోని రెడ్డీస్ కంపెనీ పక్కన ఖాళీ ప్రదేశంలో పడేశాడు. రెండు వారాలు కావడంతో డెడ్బాడీ కుళ్లిపోయి స్థానికులకు దుర్వాసన వచ్చింది. వారు పోలీసులకు సమాచారం ఇవ్వడంతో విషయం బయటకు పొక్కింది. పోలీసులు కేసు నమోదు చేసి సీసీ కెమెరాల ఆధారంగా దర్యాప్తు ప్రారంభించారు.
సూట్కేస్పై ఉన్న పేరు ఆధారంగా పలు సూట్కేస్ దుకాణాల్లో సీసీ కెమెరాలను పరిశీలించారు. చివరకు బాచుపల్లిలోని ఓ సూట్కేస్ దుకాణంలో విజయ్ సూట్కేస్ కొన్న విషయం బయటపడింది. జూబ్లీ హిల్స్లో తన బంధువుల వద్ద తలదాచుకున్న విజయ్తోపాను సెల్ఫోన్ సిగ్నిల్స్ ఆధారంగా గుర్తించి పోలీసులు అదుపులోకి తీసుకున్నారు.
