- బంగ్లాదేశీయులకు ఆమె బార్డర్ ఓపెన్ చేశారు: అమిత్ షా
- ముస్లిం ఓటు బ్యాంకు కోసం వక్ఫ్యాక్ట్ నూ వ్యతిరేకించారు
- వచ్చే ఏడాది ఆమెగద్దె దిగడం ఖాయం
- బెంగాల్ ఎన్నికలు ఆ రాష్ట్రంతో పాటు దేశ భద్రతకూ కీలకమే
- కోల్కతాలో కేంద్ర మంత్రి స్పీచ్
కోల్ కతా: బంగ్లాదేశ్ నుంచి చొరబాట్లను అరికట్టేందుకు బార్డర్లో ఫెన్సింగ్ వేద్దామని కేంద్రం ప్రయత్నిస్తుంటే.. బెంగాల్ సీఎం మమతా బెనర్జీ సర్కారు మాత్రం బీఎస్ఎఫ్కు భూమిని కేటాయించడంలేదని కేంద్ర హోంమంత్రి అమిత్ షా ఆరోపించారు. ముస్లిం ఓటు బ్యాంకు కోసం ఆమె బంగ్లాదేశీయులకు బార్డర్ ఓపెన్ చేశారని మండిపడ్డారు. బుజ్జగింపు రాజకీయాల కోసం ఆపరేషన్ సిందూర్ను, వక్ఫ్సవరణ చట్టాన్నీ ఆమె వ్యతిరేకించారని విమర్శించారు.
ఆదివారం కోల్ కతాలో బీజేపీ విజయ సంకల్ప కార్యకర్తల సమ్మేళనంలో అమిత్ షా మాట్లాడారు. వచ్చే ఏడాది జరిగే అసెంబ్లీ ఎన్నికల్లో మమత ఆధ్వర్యంలోని టీఎంసీ సర్కార్ గద్దె దిగడం ఖాయమన్నారు. ఆ ఎన్నికలు బెంగాల్ భవిష్యత్తుకే కాకుండా దేశ భద్రతకు కూడా కీలకమన్నారు. బంగ్లా నుంచి చొరబాట్లకు అడ్డుకట్ట వేయడం బీజేపీ సర్కారుకే సాధ్యమన్నారు.
రెండు నెలల కిందట ముర్షిదాబాద్ లో జరిగిన మత ఘర్షణల సమయంలో బీఎస్ఎఫ్ బలగాలను మోహరించి ఉంటే హిందువులపై దాడులు ఆగిపోయేవని, కానీ మమత అందుకు ఒప్పుకోకుండా హింస కొనసాగేందుకు కారణమయ్యారని అమిత్ షా ఆరోపించారు. పహల్గాంలో టెర్రరిస్టులు హిందువులను కాల్చిచంపితే స్పందించని మమత.. ఆపరేషన్ సిందూర్లో పాకిస్తాన్ టెర్రరిస్టులను మన బలగాలు మట్టుబెడితే మాత్రం బాధపడ్డారని విమర్శించారు.
ఓటు బ్యాంకు రాజకీయాల కోసమే ఆమె ఆపరేషన్ సిందూర్ను వ్యతిరేకించారని అన్నారు. ఆపరేషన్ సిందూర్ను వ్యతిరేకించిన వాళ్లకు వచ్చే ఎన్నికల్లో సిందూరం విలువ తెలిసి వచ్చేలా చేయాలని బెంగాల్ మహిళలకు అమిత్ షా పిలుపునిచ్చారు.
ఫోరెన్సిక్ ల్యాబ్ల ఆధునికీకరణ
దేశవ్యాప్తంగా ఫోరెన్సిక్ సైన్స్ ల్యాబ్లను ఆధునికీకరించేందుకు రూ. 2,080 కోట్లు కేటాయించనున్నట్టు కేంద్ర హోంమంత్రి అమిత్ షా ప్రకటించారు. ఫోరెన్సిక్ సైన్స్ ల్యాబ్లను శక్తిమంతం చేయడం ద్వారా కోర్టుల్లో మరింత మెరుగైన న్యాయం అందుతుందన్నారు. ఆదివారం కోల్ కతా శివారులోని రాజర్ హాట్లో సెంట్రల్ ఫోరెన్సిక్ సైన్స్ ల్యాబొరేటరీ కొత్త బిల్డింగ్నుఅమిత్ షా ప్రారంభించారు.
ఈ సందర్భంగా ఆయన మాట్లాడుతూ.. దేశవ్యాప్తంగా ఫోరెన్సిక్ సైన్స్ ల్యాబ్లను ఆధునికీకరిస్తామ ని తెలిపారు. రూ. 200 కోట్లతో కొత్తగా ఫోరెన్సిక్ డేటా సెంటర్నూ ఏర్పాటు చేస్తామన్నారు. వివిధ రాష్ట్రాల్లో 9 నేషనల్ ఫోరెన్సిక్ సైన్స్ వర్సిటీల ఏర్పాటుకు రూ. 1,300 కోట్లు ఖర్చు చేయనున్నట్టు తెలిపారు.
