రామక్క గుర్తుపట్టేనా? .. బీఆర్ఎస్కు పొంచిఉన్న గుర్తుల గండం

భువనగిరిలో కారుగుర్తు కిందే రోడ్డు రోలర్
ఆలేరులో సమీపంలోనే చపాతీ రోలర్ ముప్పు
అన్ని నియోజకవర్గాల్లోనూ ఇదే సీన్

యాదాద్రి, వెలుగు : గుర్తుల గుర్తుంచుకో.. రామకా! కారు గుర్తుంచుకో’ అని బీఆర్ఎస్ పార్టీ ప్రచార పాటను బాగానే మార్మోగిస్తోంది కానీ, తీరా ఎన్నికల రోజు ఓటు మిషన్లో ‘రామక్క ఆ కారు గుర్తును గుర్తు పడుతుందా లేదా?’ అన్నదే ఇప్పుడు బీఆర్ఎస్అభ్యర్థులను తీవ్ర ఆందోళనకు గురిచేస్తోంది. కారు గుర్తును పోలిన రోడ్ రోలర్, చపాతీ రోలర్ గుర్తులు రెండూ ఈవీఎంలో బీఆర్ఎస్ అభ్యర్థుల సమీపంలోనే ఉన్నాయి. గత ఎన్నికలో ఇలాంటి గుర్తులే బీఆర్ఎస్ పుట్టి ముంచినట్టు ఆ పార్టీ నేతలు గగ్గోలు పెట్టారు. ఈ అసెంబ్లీ ఎన్నికల్లో కూడా బీఆర్ఎస్అభ్యర్థులకు గుర్తుల గండం తప్పడం లేదు. దాదాపు అన్ని నియోజకవర్గాల్లో కారు గుర్తును పోలిన రోడ్డు రోలర్, చపాతీ రోలర్ గుర్తులతో అభ్యర్థులు పోటీలో ఉన్నారు. అదీ బీఆర్ఎస్ అభ్యర్థులకు సమీపంలో నే ఉండడం మరింత దడ పుట్టిస్తోంది.

గుర్తుల ప్రభావం గట్టిగానే..

కిందటి అసెంబ్లీ ఎన్నికల్లోనూ ఈ రెండు గుర్తులు కారు గుర్తుకు సమీపంలో ఉండడంతో ఆ పార్టీల అభ్యర్థులకు ఓట్లు ఎక్కువ వచ్చాయి. అవి బీఆర్ఎస్ ఓట్లే అని అందరి అంచనా.. అప్పడంటే రాష్ట్ర వ్యాప్తంగా బీఆర్ఎస్కు పరిస్థితి అనుకూలంగా ఉండటంతో కారు గుర్తుకు పడాల్సిన ఓట్లు రోడ్డు రోలర్, చపాతీ రోలర్ పడ్డా.. బీఆర్ఎస్ ఎమ్మెల్యేలు తక్కువలో తక్కువ ఓట్లతో అయినా గెలిచారు. కొన్ని చోట్ల ఈ గుర్తులకు ఎక్కువ ఓట్లు రావడంతో బీఆర్ఎస్ లీడర్లు ఓడిపోయారని కూడా ఆందోళన వ్యక్తం చేశారు. అయితే ఈసారి కాంగ్రెస్గాలి వీస్తుండడం, బీఆర్ఎస్ రెండు దఫాల పాలనను ప్రతిపక్షాలు ఎండగడుతూ ఓడించే పని పెట్టుకున్నారు. ఈ క్రమంలో ఈ గుర్తుల గండం పొంచి ఉండడంతో ఇటు బీఆర్ఎస్ అభ్యర్థుల్లో, శ్రేణుల్లో మరింత ఆందోళన మొదలైంది.

ఆ గుర్తులపై బీఆర్ఎస్ పోరాటం..

2018 ఎన్నికల్లో నల్గొండ జిల్లాలోని నకిరేకల్తో పాటు మరికొన్ని సీట్లలో తమ అభ్యర్థులు ఓడిపోయారని బీఆర్ఎచెబుతోంది.ఈ ఎన్నికల్లో ఆ గుర్తులను ఎవరికీ కేటాయించవద్దని కోర్టును ఆశ్రయంచింది. అయితే బీఆర్ఎస్ పిటిషన్ను కోర్టు తోసిపుచ్చింది.

కారుకు సైడ్ ఇవ్వబోమన్న రోలర్లు..

ఈ ఎన్నికల్లో రోడ్డు రోలర్, చపాతి రోలర్ గుర్తులు ఈవీఎం బ్యాలెట్లోకి రాకుండా చేయాలని బీఆర్ఎస్ ప్రయత్నించిందన్న ప్రచారం జరిగింది. ఇందులో భాగంగానే యుగ తులసి పార్టీ అభ్యర్థుల నామినేషన్లు ఉపసంహరించుకోవాలని ప్రయత్నించినట్టు తెలుస్తోంది. కొన్ని చోట్ల ఇండిపెండెండ్లకు రోడ్డు రోలర్ను వచ్చింది.

కారుకు సమీపంలోనే ..

భువనగిరిలో అసెంబ్లీ బ్యాలెట్లో కారు గుర్తు నాలుగో నెంబర్లో ఉండగా యుగతులసి అభ్యర్థి తోట శ్రీనివాస్ సింబల్ రోడ్డు రోలర్ ఆరో నెంబర్లో ఉంది. అలియన్స్ ఆఫ్ డెమోక్రటిక్ రిఫామ్స్ పార్టీ అభ్యర్థి నీల నర్సింహ్మా సింబల్ చపాతి రోలర్ తొమ్మిదో నెంబర్లో ఉంది. కారుకు రోడ్డు రోలర్, చపాతి రోలర్కు పెద్దగా తేడా లేకపోవడంతో ఓటర్లు రోలర్కు వేస్తారన్న ఆందోళన బీఆర్ఎస్ను వెంటాడుతోంది.
ఆలేరులో కారు రెండో గుర్తుగా ఉండగా అలియన్స్ ఆఫ్ డెమోక్రటిక్ రిఫామ్స్ పార్టీ అభ్యర్థి గడ్డమీది శ్రావణి గుర్తు చపాతి రోలర్ 6 నెంబర్గా ఉంది. యుగతులసి అభ్యర్థి శిఖ శ్రీనివాస్ గుర్తు రోడ్డు రోలర్ 10వ నెంబర్లో ఉంది.
నాగార్జున సాగర్లో మూడో నెంబర్లో కారు ఉండగా.. ఐదో నెంబర్లో చపాతి రోలర్ ఉంది. నల్గొండలో కారు రెండులో ఉండగా చపాతి రోలర్ 5లో ఉంది.
నకిరేకల్, మునుగోడు, హుజూర్నగర్, సూర్యాపేట, తుంగతుర్తి, కోదాడలో రోడ్డు రోలర్, చపాతి రోలర్ గుర్తులు యుగతులసి, అలియన్స్ ఆఫ్ డెమోక్రటిక్ రిఫామ్స్ పార్టీ అభ్యర్థులు, ఇండిపెండెంట్ అభ్యర్థులు పోటీ చేస్తున్నారు. బీఆర్ఎస్ సీట్లు తగ్గే అవకాశం కూడా ఉందని వస్తున్న అంచనాలకు తోడు.. ఈ రోడ్డు రోలర్, చపాతీ రోలర్ల గండం కూడా దాటి గట్టెక్కుతారా లేదా? రామక్కకు కారు గుర్తు కనిపిస్తుందా లేదా అన్నది వేచి చూడాలి.