- బీజేపీ, వీహెచ్ పీ నేతల దేహశుద్ధి
- చేర్యాల పోలీసులకు దళిత సంఘాల ఫిర్యాదు
చేర్యాల, వెలుగు: మద్యం మత్తులో హనుమాన్ ఆలయాన్ని ధ్వంసం చేసిన విషయం తెలియడంతో బీజేపీ, వీహెచ్ పీ నేతలు ఓ యువకుడికి దేహశుద్ధి చేసిన ఘటన సోషల్మీడియాలో వైరల్గా మారింది. చేర్యాల మండలం వేచరేణి ఎల్లదాస్నగర్కు చెందిన ఊపిరి అజయ్కుమార్ మూడు రోజుల కింద మద్యం మత్తులో హనుమాన్ విగ్రహాన్ని, పక్కనే ఉన్న ఇతర దేవతా విగ్రహాలను ధ్వంసం చేయడమే కాకుండా కాలితో తన్నాడు. ఈ విషయం తెలుసుకున్న బీజేపీ, వీహెచ్పీ, ఆర్ఎస్ఎస్నాయకులు యువకుడిని తాళ్లతో కట్టేసి, రోడ్లపై ఊరేగించి చితకబాదారు. విగ్రహాల ధ్వంసం వెనుక ఎవరైనా ఉన్నారా అని యువకున్ని ప్రశ్నించి వివరాలు సేకరించే ప్రయత్నం చేశారు.
ఈ నేపథ్యంలో అజయ్కుమార్దళిత వర్గానికి (బుడగజంగాలు) చెందినందునే బీజేపీ నాయకులు దాడి చేశారని ఆరోపిస్తూ దళిత సంఘాలు పోలీసులకు ఫిర్యాదు చేశారు. అజయ్పై దాడిని తీవ్రంగా ఖండిస్తున్నామని, దేవతా విగ్రహాలను అవమానిస్తే చట్ట ప్రకారంగా చర్యలు తీసుకోవాలే తప్ప చట్టాన్ని తమ చేతిలోకి తీసుకొని యువకుడిని చితకబాదడం అమానుషమని పేర్కొంటూ సీఐ శ్రీనుకు ఫిర్యాదు చేశారు. ఈ విషయంపై సీఐ మాట్లాడుతూ సంఘటన వివరాలను పూర్తి స్థాయిలో తెలుసుకుని దాడి చేసిన వారిపై చట్టరీత్యా చర్యలు తీసుకుంటామని తెలిపారు.
