- హెచ్చరిక బోర్డులు లేకుండా స్పీడ్ బ్రేకర్ల ఏర్పాటుతో ప్రమాదం
- రంగారెడ్డి జిల్లా ఇబ్రహీంపట్నంలో ఘటన
ఇబ్రహీంపట్నం, వెలుగు: రంగారెడ్డి జిల్లాలో మరో ఘోర బస్సు ప్రమాదం తప్పింది. ఇబ్రహీంపట్నం మండలం శేరిగూడ వద్ద ఆర్టీసీ, ట్రావెల్ బస్సులు ఢీకొన్నాయి. అదృష్టవశాత్తు ఈ ఘటనలో ఎలాంటి ప్రాణనష్టం జరగలేదు. ఏపీలోని పొదిలి డిపోకు చెందిన ఆర్టీసీ బస్సు హైదరాబాద్ వస్తున్నది. సోమవారం తెల్లవారుజామున శేరిగూడ దగ్గరకు రాగానే.. స్పీడ్ బ్రేకర్ దగ్గర ఆర్టీసీ బస్సు స్లో అయింది.
అదే టైమ్లో దోస్త్ టూర్స్ అండ్ ట్రావెల్స్ బస్సు వెనుక నుంచి ఢీకొట్టింది. ఈ ఘటనలో ఆర్టీసీ బస్సు వెనుక భాగం, ట్రావెల్స్ బస్సు ముందు భాగం దెబ్బతిన్నాయి. 2 బస్సుల్లో సుమారు 100 మంది ప్రయాణికులు ఉండగా, ఎవరికీ ఎలాంటి గాయాలు కాలేదు. ప్రమాదం జరిగిన వెంటనే.. ప్రయాణికులంతా దిగి మరో బస్సులో వెళ్లిపోయారు. ఈ ఘటనతో హైవేపై దాదాపు గంటకు పైగా ట్రాఫిక్ జామ్ అయింది.
ఆ స్పీడ్ బ్రేకర్ వల్లే ప్రమాదం!
వారం రోజుల కిందే రోడ్డు, భవనాల శాఖ అధికారులు ఈ స్పీడ్ బ్రేకర్ను ఏర్పాటు చేశారు. ఈ స్పీడ్ బ్రేకర్ కారణంగానే ఇటీవల 2 ప్రమాదాలు జరిగాయి. దీంతో అధికారులు ఆ స్పీడ్ బ్రేకర్ ను తొలగించారు. ఆదివారం మళ్లీ ఎలాంటి హెచ్చరిక బోర్డులు లేకుండా స్పీడ్ బ్రేకర్ వేయడంతో ఈ ప్రమాదం జరిగినట్లు స్థానికులు తెలిపారు. స్పీడ్ బ్రేకర్లు వేస్తే హెచ్చరికల బోర్డులు ఏర్పాటు చేయాలని వాహనదారులు కోరుతున్నారు. ప్రమాద ఘటనపై ఇబ్రహీంపట్నం పోలీసులు కేసు నమోదు చేసి దర్యాప్తు చేస్తున్నారు.
