నిరాడంబరతకు మారుపేరు రాధాకృష్ణన్ : మోదీ

• రాజ్యసభ కొత్త చైర్మన్​ను ప్రశంసించిన ప్రధాని మోదీ

న్యూఢిల్లీ: ఇటీవల ఉప రాష్ట్రపతిగా ఎన్నికైన సీపీ రాధాకృష్ణన్​ సోమవారం రాజ్యసభ చైర్మన్​గా బాధ్యతలు తీసుకున్నారు. ఈ సందర్భంగా సభలో ఆయనకు ప్రధాని మోదీ సహా సభ్యులు ఘన స్వాగతం పలికారు. శుభాకాంక్షలు తెలియజేశారు. మోదీ మాట్లాడుతూ.. నిరాడంబరతకు  మారు పేరు రాధాకృష్ణన్​ అని, సుదీర్ఘ కాలంగా ఆయన ప్రజా సేవలో ఉన్నారని కొనియాడారు. ‘‘రైతు కుటుంబం నుంచి వచ్చిన రాధాకృష్ణన్​ కీలక స్థాయికి ఎదిగారు. ఆయన ఎదుగుదల మన ప్రజాస్వామ్య స్ఫూర్తికి నిదర్శనం. తెలంగాణ, జార్ఖండ్​, మహారాష్ట్రకు గవర్నర్​గా, పుదుచ్ఛేరికి లెఫ్టినెంట్​ గవర్నర్​గా రాధాకృష్ణన్​ విశేష సేవలు అందించారు.

గవర్నర్​గా ఉన్నప్పుడు ప్రొటోకాల్​ను  కూడా పక్కనబెట్టి జనంలోకి వెళ్లేవారు. అదీ ఆయనకు ప్రజాసేవ పట్ల ఉన్న అంకితభావానికి ఉదాహరణ” అని ప్రశంసించారు. సమాజ సేవ చేయాలని కోరుకునే ప్రతి ఒక్కరికీ రాధాకృష్ణన్​ ప్రయాణం స్ఫూర్తిదాయకమన్నారు. ‘‘రాధాకృష్ణన్​ బాలుడిగా ఉన్నప్పుడు ఓ ఆలయ కోనేరులో పడిపోయారు. నీట మునగకుండా ఆయన చాకచక్యంగా బయటపడ్డారు. కోయంబత్తూర్‌‌‌‌లో ఎల్​కే అద్వానీ యాత్రే లక్ష్యంగా జరిగిన బాంబు దాడి నుంచి కూడా రాధాకృష్ణన్​ ప్రాణాలతో బయటపడ్డారు. బాంబు దాడిలో నాడు 70 మంది వరకు చనిపోయారు. ఇలాంటి ప్రమాదాల నుంచి బయటపడ్డ రాధాకృష్ణన్​.. 

సమాజ సేవ కోసం తన జీవితాన్ని అంకితం చేశారు” అని మోదీ కొనియాడారు. ఓసారి రాధాకృష్ణన్ కాశీకి వచ్చినప్పుడు.. మాంసాహారాన్ని విడిచిపెట్టాలని నిర్ణయించుకున్నారని, ఇదీ ఆయన ఆధ్యాత్మిక సంకల్పానికి నిదర్శనమని పేర్కొన్నారు. ‘‘ప్రజా జీవితంలోని సుదీర్ఘ అనుభవం, చిత్తశుద్ధి కలిగిన రాధాకృష్ణన్​ ఇప్పుడు  చైర్మన్​ హోదాలో  రాజ్యసభకు మార్గనిర్దేశనం చేయనున్నారు” అని ప్రధాని మోదీ తెలిపారు.