- అమెరికా వైపు వస్తున్న వలసదారులను దేశంలోకి అనుమతించబోమని స్పష్టీకరణ
వాషింగ్టన్: అమెరికా బార్డర్ వైపు వస్తున్న వలసదారులను తక్షణమే అడ్డుకోకపోతే, మెక్సికోపై విధిస్తున్న టారిఫ్‌‌‌‌‌‌‌‌లను రెట్టింపు చేస్తానని అమెరికా అధ్యక్షుడు డొనాల్డ్ ట్రంప్ హెచ్చరించారు. గ్వాటెమాలా బార్డర్ సమీపంలోని దక్షిణ మెక్సికో సిటీ తపాచులా నుంచి సుమారు 1,500 మంది వలసదారులు కాలినడకన ఉత్తరం వైపు బయలుదేరిన మరుసటి రోజే ట్రంప్ ఈ హెచ్చరిక చేశారు. ఈ మేరకు గురువారం ‘ట్రూత్ సోషల్’లో ఆయన ఒక పోస్ట్ పెట్టారు.
దీన్ని అమెరికాపై జరుగుతున్న కొత్త వలసదారుల దండయాత్రగా అభివర్ణించారు. మెక్సికో వారిని తక్షణమే ఆపాలని, లేకపోతే ఆ దేశంపై టారిఫ్లు వెంటనే రెట్టింపు అవుతాయని, ఇందులో ఎటువంటి సడలింపు ఉండదని స్పష్టం చేశారు. విదేశాలు తమ దేశాల్లో వద్దనుకున్న వ్యక్తులను అమెరికా వైపు పంపిస్తున్నాయని, వారిని ఎట్టి పరిస్థితుల్లోనూ దేశంలోకి అనుమతించబోమని ఆయన తేల్చిచెప్పారు. మరోవైపు, నవంబర్ 3న జరిగిన మిడ్ టర్మ్ ఎన్నికల్లో తాను పోటీలో లేనని, ఆ ఎన్నికల ఫలితాలతో తనకు సంబంధం లేదని ట్రంప్ మరోసారి పేర్కొన్నారు.
తన తాజా హెచ్చరికల గురించి మెక్సికో అధికారులతో పాటు యూఎస్ బార్డర్ పెట్రోల్, ఇమిగ్రేషన్ అండ్ కస్టమ్స్ ఎన్‌‌‌‌‌‌‌‌ఫోర్స్‌‌‌‌‌‌‌‌మెంట్ (ఐసీఈ), అలాగే టెక్సాస్ కొత్త గవర్నర్‌‌‌‌‌‌‌‌గా ఎన్నికైన డెమోక్రాట్ నాయకురాలు గినా హినోజోసాకు కూడా సమాచారం అందించినట్టు వెల్లడించారు. అయితే, ట్రంప్ హెచ్చరికలపై మెక్సికో ప్రభుత్వం నుంచి ఇప్పటివరకు ఎటువంటి అధికారిక స్పందన వెలువడలేదు.
