హజారీబాగ్ (జార్ఖండ్) : రాబోయే రెండేండ్లలో పాకిస్తాన్, బంగ్లాదేశ్‌ బార్డర్లో పూర్తి సెక్యూరిటీ పెంచుతామని కేంద్ర హోం మంత్రి అమిత్ షా తెలిపారు. ప్రస్తుతం ఈ రెండు సరిహద్దుల వెంట 60 కిలోమీటర్ల పొడవున ఖాళీలను పూడ్చే పని జరుగుతోందని తెలిపారు. సరిహద్దు భద్రతా దళం (బీఎస్ఎఫ్) 59వ ఆవిర్భావ దినోత్సవ వేడుకల సందర్భంగా శుక్రవారం జార్ఖండ్ లోని మేరు శిక్షణా శిబిరంలో నిర్వహించిన కార్యక్రమంలో అమిత్షా మాట్లాడారు.
ప్రధాని మోదీ ప్రభుత్వం కేంద్రంలో అధికారంలోకి వచ్చిన తర్వాత గత తొమ్మిదేండ్లలో పాకిస్తాన్, బంగ్లాదేశ్‌ సరిహద్దుల్లో 560 కిలోమీటర్ల మేర కంచె వేసి, ఖాళీలను పూడ్చామని చెప్పారు. మరో 60 కి.మీ. మాత్రమే పని మిగిలి ఉందని, వచ్చే రెండేండ్లలో ఈ రెండు సరిహద్దుల్లో పూర్తి భద్రతా ఏర్పాట్లు చేపడతామని అమిత్ షా చెప్పారు. అలాగే, "సరిహద్దు కంచె మాత్రమే దేశాన్ని రక్షించదని, ధైర్యవంతులైన బీఎస్ఎఫ్ జవాన్లే ఈ పనిని చేస్తున్నారు..” అని ఆయన తెలిపారు. దేశంలో బీజేపీ అధికార పగ్గాలు చేపట్టి సమయంలో.. మాజీ ప్రధాని వాజ్‌పేయి నుంచి మోదీ ప్రభుత్వం వరకు సరిహద్దు భద్రతకు ప్రాధాన్యం ఇచ్చారన్నారు.
