ట్రాఫిక్ కు మారుపేరుగా ప్రసిద్ధి గాంచిన బెంగళూరు మరోసారి భారీ ట్రాఫిక్‌ను ఎదుర్కొంది. వాహనాలు గంటల తరబడి రోడ్లపై నిలిచిపోయాయి. వీటిలో చాలా వరకు బ్రేక్‌డౌన్‌లను ఎదుర్కొన్నాయి. నగరంలోని ఔటర్ రింగ్ రోడ్ (ఓఆర్‌ఆర్) ప్రాంతం అత్యంత అధ్వాన్నంగా తయారైంది. ఈ క్రమంలో ప్రజలు ఐదు గంటలకు పైగా అక్కడే ఉండిపోయారని ఫిర్యాదు చేశారు.
రైతులు, 'కర్ణాటక జల సంరక్షణ సమితి' పిలుపునిచ్చిన బెంగళూరు బంద్ జరిగిన ఒక రోజు తర్వాత ఈ పరిణామం చోటుచేసుకుంది. కావేరీ నదీ జలాలను తమిళనాడుకు విడుదల చేయడాన్ని నిరసిస్తూ ఈ బంద్‌కు పిలుపునిచ్చారు. అయితే తాజాగా ఈ ట్రాఫిక్ ను గురించి లేవనెత్తుతూ చాలా మంది ఎక్స్ లో పోస్టులు, కంప్లయింట్లు పెట్టారు. తమ కార్యాలయాలకు లేదా ఇంటికి తిరిగి వెళ్లే మార్గంలో గంటల తరబడి ట్రాఫిక్‌లో చిక్కుకున్నారని చెప్పారు. రాత్రి 9 గంటలలోపు కార్యాలయం నుంచి బయటకు రావద్దని, మారతహళ్లి, సర్జాపుర మరియు సిల్క్‌బోర్డ్ మార్గాలను ఉపయోగించవద్దని వారు సూచించారు.1 కి.మీని కవర్ చేయడానికి రెండు గంటల సమయం పట్టిందని ఓ యూజర్ చెప్పడం చూస్తుంటే ట్రాఫిక్ ఏ రేంజ్ లో ఉందో అర్థమవుతోంది.
బెంగళూరులో విపరీతమైన ట్రాఫిక్ కారణంగా పాఠశాల బస్సు రాత్రి 8 గంటలకు పిల్లలను పాఠశాల నుంచి ఇంటికి దింపిందని ఓ X యూజర్ తెలిపారు. ఒక చాట్ స్క్రీన్‌షాట్‌లను పంచుకుంటూ, "పిల్లలను మరచిపోకూడదు. కొన్ని పాఠశాల బస్సులు రాత్రి 8 గంటలకు పిల్లలను దింపాయి" అని చెప్పారు. "ఈరోజు నిజంగా భయంకరమైన ట్రాఫిక్. ఆఫీసు నుంచి తిరిగి రావడానికి 5 గంటలు పట్టింది. బెంగుళూరులో ట్రాఫిక్ పీక్‌లో" అని, "బెళ్లందూరు వద్ద ట్రాఫిక్ రద్దీ కారణంగా పాదచారులకు చోటు లేకుండా పోయింది. ఫుట్‌పాత్‌పై ఇరువైపులా ద్విచక్ర వాహనాలు తిరుగుతున్నాయి. బైకర్లపై జరిమానా విధించేందుకు మీరు ఎలాంటి చర్యలు తీసుకుంటున్నారు?" అని ఇంకొకరు ప్రశ్నించారు.
బెంగళూరులో ట్రాఫిక్‌కు కారణమేమిటి?
బెంగళూరులో సెప్టెంబర్ 27న అసాధారణంగా పెరిగిన ట్రాఫిక్ అనేక కారణాల వల్ల సంభవించి ఉండవచ్చు. భారత పర్యటనలో ఉన్న హాస్యనటుడు ట్రెవర్ నోహ్ , బెంగళూరులోని ఔటర్ రింగ్ రోడ్ ప్రాంతంలో జరగాల్సిన తన ప్రదర్శనలు రద్దు చేశారు. అతను తన గమ్యాన్ని చేరుకోవడానికి 30 నిమిషాలకు పైగా ట్రాఫిక్‌లో చిక్కుకున్నట్లు సమాచారం. అతని ప్రదర్శన కోసం టిక్కెట్లు కొనుగోలు చేసిన అనేక మంది బెంగళూరు వాసులు ఈ ఈవెంట్ కు హాజరు కావడానికి ముందుగానే తమ కార్యాలయాల నుంచి బయలుదేరారు. దీంతో ఆయన ప్రదర్శనకు వెళ్లే ORRలో వాహనాల సంఖ్య కూడా పెరిగింది. వేదిక వద్దకు వెళ్లేందుకు ప్రయాణికులు 2-3 గంటలపాటు నిలిచిపోయారు.
