ఘోర రోడ్డు ప్రమాదం.. రెండు ఆర్టీసీ బస్సులు ఢీ..11 మంది మృతి

ఘోర రోడ్డు ప్రమాదం.. రెండు ఆర్టీసీ బస్సులు ఢీ..11 మంది మృతి

చెన్నై: తమిళనాడులో ఘోర రోడ్డు ప్రమాదం జరిగింది. తమిళనాడు ఆర్టీసీకి చెందిన రెండు బస్సులు ఢీకొన్న ఘటనలో 11 మంది చనిపోయారు. 40 మందికి గాయాలయ్యాయి. తమిళనాడులోని శివగంగ జిల్లాలో ఆదివారం ఈ ఘోరం జరిగింది. తమిళనాడు రాజధాని చెన్నైకి 460 కిలోమీటర్ల దూరంలో శివగంగ ఉంది. శివగంగ జిల్లా కుంద్రకుడి సమీపంలోని కుమ్మన్ గుడి దగ్గర ఈ రోడ్డు ప్రమాదం జరిగింది. 

రెండు బస్సుల్లో ఒక బస్సు తిరుప్పూరు నుంచి కారైకుడి వెళుతుండగా.. మరో బస్సు కారైకుడి నుంచి దిండిగల్ వైపు వెళుతోంది. సమతువపురం దగ్గర ఎదురెదురుగా వచ్చిన ఈ రెండు బస్సులు ఢీకొన్నాయి. రెప్పపాటు సమయంలో ఈ ఘటన జరిగింది. 9 మంది స్పాట్లోనే చనిపోయారు. మరో ఇద్దరు ఆసుపత్రిలో చికిత్స పొందుతూ చనిపోయారు.

స్థానికులు క్షతగాత్రులను కాపాడే ప్రయత్నం చేశారు. రెస్క్యూ టీంతో కలిసి సమీప ఆసుపత్రులకు క్షతగాత్రులను తరలించారు. బస్సు ప్రమాద దృశ్యాలను చూస్తుంటే.. ఈ ప్రమాదంలో ఒక బస్సు ముందు భాగం.. డ్రైవర్ సీటు ఉండే వైపు పూర్తిగా నుజ్జునుజ్జయింది. ఒక మహిళ బస్సులోకి బయటకు దూకి ప్రాణాలను కాపాడుకునే ప్రయత్నం చేసింది. 

తమిళనాడులో ఇంత ఘోరం జరగడం వారం రోజుల వ్యవధిలో ఇది రెండో ఘటన. గత వారం తెన్ కాశీ జిల్లాలో రెండు ప్రైవేట్ బస్సులు ఢీ కొన్న ఘటనలో ఆరుగురు ప్రాణాలు కోల్పోయారు. నిర్లక్ష్యపు డ్రైవింగ్ ప్రమాదానికి కారణంగా పోలీసుల విచారణలో తేలింది.