కర్ణాటకలో ఘోర రోడ్డు ప్రమాదం జరిగింది. 2024, జూన్ 28వ తేదీ శుక్రవారం తెల్లవారుజామున కర్ణాటకలోని హవేరీ జిల్లాలోని బైడగి తాలూకాలో రోడ్డుప్రక్కన ఆగి ఉన్న లారీ ట్రక్కును వేగంగా దూసుకొచ్చిన ఓ మినీబస్సు ఢీకొట్టింది. ఈ ప్రమాదంలో బస్సు ముందుభాగం నుజ్జునుజ్జు అయ్యింది. ఈ ఘటనలో దాదాపు 13 మంది ప్రాణాలు కోల్పోగా, మరో ఇద్దరు తీవ్రంగా గాయపడ్డారు.
యల్లమ్మ దేవి దర్శనార్థం తీర్థయాత్రకు వెళ్లిన కొందరు.. యాత్ర ముగించుకుని బెళగావి జిల్లాలోని సవదత్తి నుంచి మినీబస్సు తిరిగి వస్తుండగా ఈ ఘటన జరిగినట్లు అధికారులు తెలిపారు. సమాచారం అందుకున్న పోలీసులు.. హుటాహుటినా సంఘటనాస్థలానికి చేరుకుని సహాయక చర్యలు చేపట్టారు.
గాయపడిన వారిని చికిత్స కోసం ఆస్పత్రికి తరలించారు. ప్రస్తుతం వారి పరిస్థితి విషమంగా ఉన్నట్లు వైద్యులు తెలిపారు. ఈ ప్రమాదంలో బాధితులను గుర్తించేందుకు ప్రయత్నిస్తున్నట్లు పోలీసులు తెలిపారు. బస్సు డ్రైవర్ నిద్రమత్తులో ఉండడం వల్లే ఈ ప్రమాదం జరిగినట్లు తెలుస్తోంది. ఈఘటనపై పోలీసులు కేసు నమోదు చేసి దర్యాప్తు చేస్తున్నారు.
