మంచిర్యాల, వెలుగు: విద్యార్థుల్లో విజ్ఞాన శాస్త్రంపై ఆసక్తిని పెంపొందించి, బాల సైంటిస్టులుగా తీర్చిదిద్దేందుకు ఉద్దేశించిన ఇన్ స్పైర్ -మనక్ పథకం అవార్డులకు 2023-24 విద్యా సంవత్సరంలో జిల్లాలో 149 మంది ఎంపికయ్యారని మంచిర్యాల డీఈఓ ఎస్.యాదయ్య ఓ ప్రకటనలో తెలిపారు. ఈ పథకానికి ఎంపికైన విద్యార్థులకు ఒక్కొక్కరికి రూ.10 వేల చొప్పున ఆర్థిక సాయం అందిస్తామని, నేరుగా వారి ఖాతాల్లోకి జమ చేస్తామని చెప్పారు.
విద్యార్థులు తాము రూపొందించిన ప్రాజెక్టులతో జూన్లో నిర్వహించే జిల్లా, రాష్ట్ర, జాతీయ స్థాయిలో పోటీల్లో పాల్గొంటారని తెలిపారు. గైడ్ టీచర్ల సూచనలు, సలహాలతో జాతీయ స్థాయి పోటీల్లోనూ ఎంపికయ్యేలా కృషి చేయాలని విద్యార్థులకు సూచించారు.
