పొట్టిగుంటే ఓ బాధ.. మరీ, పొడుగ్గా పెరిగితే ఇంకో బాధ. అలాంటిదే ఈ 16 ఏళ్ల కుర్రాడి వ్యథ. పేరు మోహన్ సింగ్. ఉత్తరాఖండ్లోని పితోడ్గఢ్ సొంతూరు. 12వ తరగతి చదువుతున్నాడు. ఆ వయసులో ఉండే పిల్లలు మామూలు ఎత్తే పెరుగుతారు. కానీ, మోహన్ మాత్రం అసాధారణంగా 7.4 అడుగులు పెరిగిపోయాడు. 113 కిలోల బరువున్నాడు. నిజానికి చిన్న వయసులో హైట్ మంచిగా పెరుగుతుంటే మంచిదే కదా అని అతడి తల్లిదండ్రులు అనుకున్నారు. కానీ, మరీ ఎత్తు అయిపోతుండడంతో ఎక్కడో అనుమానం వచ్చి ఆస్పత్రికి తీసుకెళితే మెదడులో గడ్డ (బ్రెయిన్ ట్యూమర్) వల్ల ఇంత పొడుగయ్యాడని డాక్టర్లు చెప్పారు. కొద్ది రోజుల క్రితమే ఆలిండియా ఇనిస్టిట్యూట్ ఆఫ్ మెడికల్ సైన్సెస్ (ఎయిమ్స్)లో ఆపరేషన్ చేసి ఆ గడ్డను తీసేశారు. ‘‘వాడి కోసం 4ఎక్స్ఎల్ సైజు బట్టలను తీసుకునేవాళ్లం. బెడ్డు పొడవును కూడా పెంచాం. బాత్రూం సరిపోవట్లేదు. మీరట్లోని ఫ్యాక్టరీలో ప్రత్యేకంగా వాడి కోసం చెప్పులు తయారు చేయిస్తున్నాం” అని మోహన్ సింగ్ తండ్రి మహదేవ్ సింగ్ చెప్పాడు. అయితే, ఐదు నెలలుగా తలనొప్పి వస్తోందంటూ బాధపడేవాడని, స్థానిక డాక్టర్ దగ్గరకు తీసుకెళితే ఎంఆర్ఐ స్కాన్ తీయాలన్నాడని చెప్పాడు. ఆ స్కాన్లో బ్రెయిన్ ట్యూమర్ ఉండడంతో ఎయిమ్స్కు తీసుకెళ్లామని వివరించాడు.
ఎందుకంత హైట్?…
మెదడులోని చాలా ముఖ్యమైన పిట్యూటరీ గ్రంథిలో డాక్టర్లు పెద్ద ట్యూమర్ను గుర్తించారు. ఎదుగుదలను నియంత్రించే గ్రోత్ హార్మోన్ను ఆ గ్రంథే విడుదల చేస్తుంటుంది. ఆ ట్యూమర్ వల్లే గ్రంథిలో అసాధారణ రీతిలో గ్రోత్ హార్మోన్ విడుదలైందని, దాని వల్లే ఇంత హైట్ పెరిగాడని డాక్టర్లు చెబుతున్నారు. ముక్కు నుంచి ఎండోస్కోపీ ద్వారా ఆ గడ్డను తీసేసినట్టు ఎయిమ్స్ న్యూరాలజీ ప్రొఫెసర్ డాక్టర్ పీ శరత్ చంద్ర చెప్పారు. గడ్డను తొలగించాక గ్రోత్ హార్మోన్ స్థాయిలు తగ్గాయన్నారు. కొద్ది రోజుల్లో బరువు తగ్గిపోతాడని, హైట్ అంతే ఉంటాడని చెప్పారు. చాలా కొద్ది మందిలో మాత్రమే ఇలాంటి పరిస్థితి కనిపిస్తుందని వివరించారు. ఇలాంటి వాళ్లకు గుండె ముప్పులు ఎక్కువని చెప్పారు.
రెజ్లర్ ఖలీ కూడా…
వరల్డ్ రెజ్లింగ్ ఎంటర్టైన్మెంట్ (డబ్ల్యూడబ్ల్యూఈ) స్టార్ దలీప్ సింగ్ తెలుసా? దాని కన్నా ‘ద గ్రేట్ ఖలీ’ అంటే ఈజీగా గుర్తుపట్టేస్తారేమో. ఖలీకీ ఇలాంటి సమస్యే ఉండేదట. చిన్నప్పుడు ఎత్తు ఎక్కువ పెరుగుతుండడంతో చెక్ చేస్తే అతడి పిట్యూటరీ గ్లాండ్లోనూ పెద్ద గడ్డ కనిపించిందట. ఆ తర్వాత దాన్ని తీసేశారు. 8.3 అడుగులతో ప్రపంచంలోనే అతి పొడవైన వ్యక్తి సుల్తాన్ కోసెన్ (29)కూ అదే సమస్యని చెబుతూ ఉంటారు.
