- ది అసోసియేషన్ ఫర్ డెమొక్రటిక్ రీఫార్మ్స్ నివేదికలో వెల్లడి
భువనేశ్వర్: ఒడిశాలోని నాలుగు లోక్ సభ స్థానాల్లో పోటీచేస్తున్న 37 మంది అభ్యర్థుల్లో 17 మంది కోటీశ్వరులేనని ది అసోసియేషన్ ఫర్ డెమొక్రటిక్ రీఫార్మ్స్(ఏడీఆర్) నివేదిక పేర్కొన్నది. ఇక్కడ మే 13న పోలింగ్ జరుగనున్నది. నబరంగ్పూర్, బెర్హంపూర్, కోరాపుట్, కలహండి లోక్సభ స్థానాలనుంచి బరిలో నిలిచిన 37 మంది తమ అఫిడవిట్లో ఆస్తుల వివరాలు వెల్లడించారు. వీరిలో 17 మంది (46%) రూ. కోటి కంటే ఎక్కువ సంపదను కలిగి ఉన్నారని ఏడీఆర్ నివేదిక వెల్లడించింది. బీజేపీ, బీజేడీ క్యాండిడేట్లు అందరూ కోటీశ్వరులే కావడం గమనార్హం. ముగ్గురు కాంగ్రెస్ అభ్యర్థులు, నలుగురు స్వతంత్రులు, ఒకరు భారతీయ వికాస్ పరిషత్, నవ భారత నిర్మాణ సేవా పార్టీనుంచి మరొకరు కూడా కోటికిపైగా ఆస్తిని కలిగి ఉన్నారని నివేదిక పేర్కొన్నది. కాగా, కలహండి లోక్సభ బరిలో నిలిచిన బీజేపీ క్యాండిడేట్ మాలవిక దేవి రూ.41.89 కోట్ల సంపదతో అందరికంటే ధనవంతురాలిగా నిలిచారు.