- డాక్టర్ల నిర్లక్ష్యంతోనే చనిపోయారని బాధితుల ఆందోళన
నల్గొండ అర్బన్, వెలుగు : నల్గొండ ప్రభుత్వ జనరల్ హాస్పిటల్(మాతా శిశు ఆరోగ్య కేంద్రం)లో కవలలు చనిపోయారు. ఎంసీహెచ్ డాక్టర్ల నిర్లక్ష్యం కారణంగానే శిశువులు చనిపోయారని ఆరోపిస్తూ బాధితులు గురువారం మాతాశిశు ఆరోగ్య కేంద్రం ముందు ధర్నా చేశారు. శిశువుల తండ్రి సతీశ్మాట్లాడుతూ.. ఈనెల 20న తన భార్య నవ్యను కాన్పుకోసం ప్రభుత్వ ఆస్పత్రిలో అడ్మిట్ చేశానని తెలిపారు. ఆమెను పరీక్షించిన డాక్టర్లు నార్మల్ డెలివరీ అవుతుందని చెప్పారు కానీ, గురువారం ఆమెకు ఆపరేషన్ చేసి కవలలను బయటకు తీశారన్నారు.
అప్పటికే శిశువులు చనిపోయారని, డాక్టర్లు సకాలంలో ఆపరేషన్ చేసి ఉంటే పిల్లలు బతికేవారని ఆవేదన వ్యక్తం చేశారు. డాక్టర్ల నిర్లక్ష్యంతోనే తమ పిల్లలు చనిపోయారని, వారిపై చర్యలు తీసుకోవాలని డిమాండ్ చేశారు. ఈ ఘటనపై సూపరింటెండెంట్ లచ్చూ మాట్లాడుతూ.. గర్భంలోనే చిన్నారులు చనిపోయి ఉన్నారని, దీంతో ఆపరేషన్ చేసి బయటకు తీయాల్సి వచ్చిందని తెలిపారు. ఇందులో డాక్టర్ల నిర్లక్ష్యం ఏమీ లేదని స్పష్టం చేశారు.
