- వచ్చే నెల 16 నుంచి నిర్వహణకు షెడ్యూల్
ఓయూ,వెలుగు: ఉస్మానియా యూనివర్సిటీ పరిధిలో ఈనెల 2 నుంచి నిర్వహించాల్సిన 2, 4 సెమిస్టర్ పరీక్షలు వాయిదా వేశారు. ఆగస్టు 16 నుంచి నిర్వహించాలని అధికారులు షెడ్యూల్ ఖరారు చేశారు. సిలబస్ పూర్తి కానందున పరీక్షలు వాయిదా వేయాలంటూ స్టూడెంట్లు వారం రోజులుగా ఆందోళనలు చేపట్టారు. దీనిపై శనివారం కాలేజీల ప్రిన్సిపాళ్లతో వర్సిటీ అధికారులు చర్చించి నిర్ణయం తీసుకున్నారు. కొన్ని సబ్జెక్టులకు సంబంధించి సిలబస్ పూర్తి కాలేదన్న దానిపై రిజిస్ట్రార్ ప్రొఫెసర్ లక్ష్మీనారాయణ ప్రిన్సిపల్స్ను ఆరాతీశారు.
భవిష్యత్ లో ఇలాంటి పరిస్థితి రాకుండా క్యాలెండర్ ప్రకారమే సిలబస్ పూర్తి చేయటం, పరీక్షలు నిర్వహించటం చేయాలని సూచించారు. ఈనెల 26,27 తేదీల్లో ఇంటర్నల్ పరీక్షలు పూర్తి చేయాలని, ఆగస్టు 16లోపు మిగిలిన సిలబస్ను కూడా పూర్తి చేయాలని సూచించారు. సాంకేతిక కారణాలతో ఎంసీజే ప్రవేశపరీక్షను తిరిగి నిర్వహించాలని, ఇందుకు సంబంధించిన తేదీని వీలైనంత త్వరగా వెల్లడించాలని నిర్ణయించారు.