నర్సాపూర్, వెలుగు: మెదక్ జిల్లా నర్సాపూర్ లో ఫుడ్ పాయిజన్ తో 41 మంది అస్వస్థతకు గురయ్యారు. పట్టణంలోని 11వ వార్డుకు చెందిన కంప్యూటర్ ఆపరేటర్ మహ్మద్ అవేజ్ పెళ్లి ఖాయమైంది. ఆదివారం పెళ్లి జరగాల్సి ఉండగా, శుక్రవారం రాత్రి నూతన గృహ ప్రవేశంతో పాటు హల్దీ ఫంక్షన్ నిర్వహించారు.
దీనికి బంధువులు, స్నేహితులు, చుట్టుపక్కల వారు హాజరయ్యారు. ఫంక్షన్లో వారంతా నాన్ వెజ్ తిన్నారు. కొద్ది సేపటి తరువాత వాంతులు, విరేచనాలతో 41 మంది స్థానిక ప్రభుత్వ ఏరియా ఆసుపత్రిలో చేరారు. చికిత్స అనంతరం చాలా మంది కోలుకున్నారు. 9 మంది ఆసుపత్రిలో చికిత్స పొందుతుండగా, ముగ్గురు పిల్లలను మెరుగైన చికిత్స కోసం సంగారెడ్డి జిల్లా ఆసుపత్రికి తరలించారు. ఎవరికీ ప్రమాదం లేదని ఆసుపత్రి సూపరింటెండెంట్ పావని, ఆర్ఎంవో రాజేశ్తెలిపారు.
