చీకటి గదులు, వింత శబ్దాలు, వెన్నులో వణుకు పుట్టించే సన్నివేశాలు. ఓ ఆసక్తికరమైన సైకలాజికల్ హారర్ కథతో ఈ రోజు ( అక్టోబర్ 23, 2026 ) ప్రేక్షకుల ముందుకు వచ్చిన చిత్రం '418'. ప్రమోషనల్ కంటెంట్‌తో ఆసక్తి రేకెత్తించిన ఈ సినిమాకు ప్రశాంత్ నీల్, మైత్రి మూవీ మేకర్స్ మద్దతు ఉండటంతో ప్రేక్షకుల్లో కొంత బజ్ ఏర్పడింది. కిర్తన్ నాగదౌడ దర్శకత్వం వహించిన ఈ చిత్రంలో చైత్ర ఆచార్‌ కీలక పాత్ర పోషించారు. మరి ఈ హారర్ థ్రిల్లర్ ప్రేక్షకులను ఎంతవరకు మెప్పించిందో చూద్దాం..
కథేంటి?
వివేక్‌ శంకర్‌ (సూర్య రాజ్‌)ను డాక్టర్‌గా చూడాలనేది అతడి తల్లిదండ్రుల కల. ఇందుకోసం ఆస్తులు అమ్మి మరీ అతడిని మెడికల్‌ కాలేజీలో చేర్పిస్తారు. అయితే ఆ కాలేజీకి చెందిన హాస్టల్‌ గతంలో మానసిక చికిత్స కేంద్రంగా ఉండేది. దాదాపు 15 ఏళ్ల తర్వాత తిరిగి తెరిచిన ఈ హాస్టల్‌లో '418' నంబర్‌ గదిని మాత్రం మూసే ఉంచుతారు. అక్కడ ఏదో అతీంద్రియ శక్తి ఉందనే భయం అందరిలోనూ ఉంటుంది. వివేక్‌ 417 గదిలో చేరిన తర్వాత అనూహ్య సంఘటనలు ఎదురవుతాయి. అతడి స్నేహితుడు రోహిత్‌ (చరణ్‌ లక్కరాజు) మాత్రం మొదట వాటిని నమ్మడు. ఇంతకీ '418' గదిలో ఏముంది? దేవిక (చైత్ర ఆచార్‌) ఎవరు? సాయేషా (ప్రీతి పగడాల) ఆ గదిలోకి వెళ్లాలని ఎందుకు ప్రయత్నిస్తుంది? ఈ ప్రశ్నలకు సమాధానమే మిగతా కథ.
ఎలా ఉందంటే?
హారర్ సినిమాలకు ప్రధాన బలం వాతావరణం, సౌండ్‌ డిజైన్‌, ఉత్కంఠ. ఈ విషయంలో '418' కొంతవరకు మెప్పిస్తుంది. చీకటి హాస్టల్‌, మూసి ఉంచిన గది, వింత శబ్దాలు భయానక అనుభూతిని కలిగిస్తాయి. అయితే కథ ప్రారంభంలో ఏర్పడిన ఆసక్తిని దర్శకుడు కిర్తన్ నాగదౌడ అన్ని సందర్భాల్లోనూ కొనసాగించలేకపోయారు. ఫస్టాఫ్‌ నెమ్మదిగా సాగుతుంది. సెకండాఫ్ లో దేవిక నేపథ్యం, భావోద్వేగ సన్నివేశాలు కథకు కొంత బలాన్నిస్తాయి. చివరి భాగంలో భయం పెరిగినా, క్లైమాక్స్‌ మరింత ప్రభావవంతంగా ఉండాల్సింది.
ఎవరెవరు ఎలా చేశారంటే?
ఈ సినిమాకు ప్రధాన ఆకర్షణ చైత్ర ఆచార్‌. దేవిక పాత్రలో ఆమె నటన, హావభావాలు కొన్ని సన్నివేశాల్లో భయపెట్టడంతో పాటు భావోద్వేగానికి గురిచేస్తాయి. సూర్య రాజ్‌, చరణ్‌ లక్కరాజు, ప్రీతి పగడాల, రమేశ్‌ ఇందిరా తమ పాత్రలకు న్యాయం చేశారు. వెంకీ జీజీ నేపథ్య సంగీతం, అనూపమ్‌ సౌండ్‌ డిజైన్‌ హారర్ అనుభూతిని పెంచాయి. దినేశ్‌ దివాకరన్‌ సినిమాటోగ్రఫీ వాతావరణాన్ని బాగా ఆవిష్కరించింది. ఎడిటింగ్‌ ఓకే. తొలి చిత్రంతోనే కిర్తన్ నాగదౌడ మంచి ప్రయత్నం చేసినప్పటికీ, కథనంలో మరింత పట్టు అవసరం.
చివరిగా... '418'లో భయపెట్టే సన్నివేశాలు, మంచి సాంకేతిక విలువలు, చైత్ర ఆచార్‌ నటన ప్లస్‌ పాయింట్లు. అయితే నెమ్మదైన కథనం, ఆశించిన స్థాయిలో లేని క్లైమాక్స్‌ మైనస్‌లు. విపరీతమైన జంప్‌ స్కేర్స్‌ ఆశించకుండా.. వాతావరణ ఆధారిత హారర్‌ను ఆస్వాదించేవారికి ఈ సినిమాను ఒకసారి చూడొచ్చు..
