లవ్ మ్యారేజా? అరేంజ్డ్ మ్యారేజా? ఈ ఒక్క ప్రశ్న చుట్టూ ఎన్నో భావోద్వేగాలు, అపోహలు, అనుబంధాలు, అనూహ్య మలుపులు. పెళ్లి విషయంలో భిన్నమైన అభిప్రాయాలు కలిగిన ఇద్దరి జీవితాల్లో ప్రేమ ఎలాంటి మార్పులు తీసుకొచ్చింది? రహస్య ఫోన్ కాల్స్ వెనుక ఉన్న కథేంటి? ఈ ప్రశ్నలకు ఆసక్తికరమైన సమాధానంగా ప్రేక్షకుల ముందుకొచ్చిన చిత్రమే '321'. కుటుంబ బంధాలు, ప్రేమ, పెళ్లి, నమ్మకం వంటి అంశాలతో అక్టోబర్ 23, 2026న విడుదలైన ఈ సినిమా ప్రేక్షకులను ఏ మేరకు మెప్పించిందో చూద్దాం..
కథేంటి?
ప్రేమించి పెళ్లి చేసుకుంటేనే జీవితాంతం అనుబంధం బలంగా ఉంటుందని అభి నమ్ముతాడు. మరోవైపు, గత అనుభవాల కారణంగా పెళ్లి తర్వాతే నిజమైన ప్రేమకు అర్థం తెలుస్తుందని శృతి భావిస్తుంది. ఈ భిన్నమైన ఆలోచనలున్న ఇద్దరూ ఒకే ఆఫీసులో కలుసుకోవడం, అభి తొలి చూపులోనే శృతిని ప్రేమించడం కథకు ఆసక్తికరమైన ఆరంభం. శృతికి కూడా అభిపై మంచి అభిప్రాయం ఏర్పడినా, తన గతం ఆమెను భావాలను బయటపెట్టనివ్వదు. ఇంతలో అభి జీవితంలోకి రాధ మళ్లీ రావడం, లయ అనే మహిళ నుంచి రహస్య కాల్స్ రావడం కథలో ఉత్కంఠను పెంచుతాయి. చివరికి అభి ఎవరిని పెళ్లి చేసుకుంటాడు? లయ ఎవరు? అన్నది తెరపై చూడాల్సిందే.
ఎవరెవరు ఎలా చేశారంటే?
అభిగా మోహిత్ పెడద సహజమైన నటనతో ఆకట్టుకోగా, శృతిగా లావణ్య సహుకర హుందాతనంతో మెప్పించింది. వివాన్ సూర్య, లక్ష్మి వెన్నెల తమ పాత్రలకు న్యాయం చేశారు. దర్శకుడు శాంతికుమార్ చిలుముల అసభ్య హాస్యానికి, అనవసరమైన కమర్షియల్ హంగులకు దూరంగా కుటుంబ ప్రేక్షకులకు నచ్చే కథను తెరకెక్కించారు. కాల్విన్ జాయ్ సంగీతం, నేపథ్య స్వరాలు భావోద్వేగాలకు తోడయ్యాయి. సినిమాటోగ్రఫీ కూడా కథలోని కుటుంబ, ఆఫీస్ వాతావరణాలను సహజంగా ఆవిష్కరించింది.
ఎలా ఉందంటే?
ప్రేమ, పెళ్లిపై భిన్నమైన ఆలోచనలు, కుటుంబ అనుబంధాలు, రహస్య కాల్స్ చుట్టూ సాగే ఉత్కంఠచ, సహజమైన నటన ఈ చిత్రానికి ప్రధాన బలాలు. ముఖ్యంగా పెళ్లి పద్ధతి కంటే పరస్పర అవగాహన, గౌరవం, నిబద్ధత ముఖ్యమనే సందేశం ఆకట్టుకుంటుంది. మొదటి భాగంలో కొన్ని సన్నివేశాలు నెమ్మదిగా సాగుతాయి. కొన్ని ప్రేమ సంభాషణలు, కుటుంబ సన్నివేశాలు రొటీన్‌గా అనిపిస్తాయి. ఆఫీస్ సన్నివేశాలను మరింత ఆసక్తికరంగా తీర్చిదిద్దితే సినిమా వేగం పెరిగేది.
'321' అంటే కేవలం ఒక టైటిల్ కాదు.. మూడు ముళ్లు, రెండు మనసులు, ఒక జీవితానికి ప్రతీకగా నిలిచే ప్రయత్నం. ప్రేమ వివాహమా, పెద్దలు కుదిర్చిన పెళ్లా అన్న వాదనకు బదులుగా, ఒకరినొకరు అర్థం చేసుకోవడమే దాంపత్య జీవితానికి అసలైన పునాది అని ఈ చిత్రం చెబుతుంది. భారీ హంగులు, వేగవంతమైన కథనం ఆశించే వారికి కొన్ని లోపాలు కనిపించినా, కుటుంబ అనుబంధాలు, ప్రేమ, చిన్నపాటి మిస్టరీతో కూడిన క్లీన్ ఎంటర్‌టైనర్ కోరుకునేవారికి '321' ఒకసారి చూడదగ్గ చిత్రం.
