అబూజ్​మడ్ అడవుల్లో భారీ ఎన్‌కౌంటర్

•     8 మంది మావోయిస్టులు మృతి
•     ఒక జవాన్​ కూడా మృతి... ఇద్దరికి గాయాలు 
•     కొనసాగుతున్న కూంబింగ్

భద్రాచలం, వెలుగు : ఛత్తీస్​గఢ్​లో నారాయణ్​పూర్​ జిల్లా అబూజ్​మడ్​ అడవుల్లో శనివారం జరిగిన భారీ ఎన్​కౌంటర్ లో 8 మంది మావోయిస్టులు చనిపోయారు. మావోయిస్టుల కాల్పుల్లో ఒక ఎస్టీఎఫ్​ జవాన్  ప్రాణాలు కోల్పోగా..  ఇద్దరు  జవాన్లు తీవ్రంగా గాయపడ్డారు. దట్టమైన అడవులు, పర్వత ప్రాంతాల్లో జరుగుతున్న ఈ భారీ ఆపరేషన్​లో నారాయణ్​పూర్, కొండెగావ్, కాంకేర్, దంతెవాడ జిల్లాలకు చెందిన డీఆర్జీ, ఎస్టీఎఫ్, బీఎస్ఎఫ్, ఐటీబీపీ 53వ బెటాలియన్​కు చెందిన 1400 మంది జవాన్లు పాల్గొన్నారు. 

రెండు రోజుల క్రితమే నాలుగు జిల్లాలకు చెందిన బలగాలు నారాయణ్​పూర్​ జిల్లాలోని అబూజ్​మడ్  అడవుల్లో ఉన్న కుతుల్, ఫర్సాబేడా, కొడ్తామేట గ్రామాల్లో ఆపరేషన్​ షురూ చేశారు. జవాన్లు అధునాతన ఆయుధాలతో అడవులను జల్లెడ పడుతున్నారు. జవాన్లు శుక్రవారం నుంచే కూంబింగ్​ ప్రారంభించి అడవుల నుంచి తిరిగి వస్తుండగా శనివారం ఉదయం కుతుల్​ గ్రామం వద్ద మావోయిస్టులు ఎదురయ్యారు. ఈ క్రమంలో ఇరు పక్షాల మధ్య కాల్పులు జరిగాయి. కొంతమంది మావోయిస్టులు గాయపడి పారిపోతుండగా.. వారిని వెంబడిస్తూ బలగాలు వెళ్లాయి. దట్టమైన కొండ ప్రాంతాలు కావడంతో బలగాలు బయటకు రావడానికి ఇబ్బందిగా మారింది. కాగా.. మావోయిస్టుల కాల్పుల్లో గాయపడిన జవాన్లను హెలికాప్టర్ లో ​రాయ్​పూర్​లోని ఓ ఆసుపత్రికి తరలించారు. సీఎం విష్ణుదేవ్​ సాయి మాట్లాడుతూ గాయపడిన జవాన్లు త్వరగా కోలుకోవాలని దేవుడిని ప్రార్థిస్తున్నట్లు తెలిపారు. చనిపోయిన జవాను కుటుంబానికి సంతాపం ప్రకటించారు.

ఆయుధాలు స్వాధీనం

ఎన్​కౌంటర్​ ప్రదేశం నుంచి భద్రతా బలగాలు ఇన్సాస్​ తుపాకులు, 303 రైఫిల్స్, బీఎల్జీ లాంచర్లు, డిటోనేటర్లు, నిత్యావసర సరుకులను స్వాధీనం చేసుకున్నాయి. నారాయణ్​పూర్​ జిల్లా ఓర్చా పోలీస్​స్టేషన్​ పరిధిలోని కుతుల్, ఫర్సాబేడా, కొడ్తామేట గ్రామాల అడవుల్లో భారీ సంఖ్యలో మావోయిస్టులు మాటు వేశారనే సమాచారంతో బస్తర్​ ఐజీ సుందరరాజ్​ అలర్ట్  అయ్యారు. నిఘా వర్గాల నుంచి సేకరించిన సమాచారంతో బలగాలను ఈ ప్రాంతంలో కూంబింగ్​కు దించారు. కాగా.. ఛత్తీస్​గఢ్​ దండకారణ్యంలో గడిచిన 161 రోజుల్లో జరిగిన వివిధ ఎన్​కౌంటర్లలో 141 మంది మావోయిస్టులు మృతి చెందారు.