ఆ మాన్షన్లో ఏం జరిగింది?
టైటిల్ : అశ్విన్స్
లాంగ్వేజ్ : తెలుగు
కాస్ట్ : వసంత్ రవి, మురళీధరన్, విమలా రామన్, సరస్వతి మెనన్, ఉదయ దీప్
డైరెక్షన్ : తరుణ్ తేజ, ప్లాట్ ఫాం: నెట్ఫ్లిక్స్
ఆర్తి రాజగోపాలన్ (విమలా రామన్) ఆర్కియాలజిస్ట్. మత సంప్రదాయాలు బాగా తెలిసిన వ్యక్తి. ఆమెకి చెందిన ఒకప్పటి పాత మాన్షన్లో దెయ్యాలున్నాయని ప్రచారంలో ఉంటుంది. ఆ బిల్డింగ్లోకి వెళ్లడం డేంజర్ అని తెలిసినా అర్జున్ (వసంత్), రితూ (సరస్వతి) వాళ్ల ఫ్రెండ్స్తో కలిసి యూట్యూబ్ వీడియో కోసం ఆ బిల్డింగ్లోకి వెళ్తారు. అప్పటి నుంచి వాళ్లలో ప్రతి ఒక్కరికీ ఒక ఎక్స్పీరియెన్స్ ఎదురవుతుంది. చివరికి వాళ్లు చావుబతుకుల మధ్య ఉన్నప్పుడు అర్జున్కి దెయ్యాల బారి నుంచి ఫ్రెండ్స్ని కాపాడుకునేందుకు ఒకే ఒక ఛాన్స్ ఉంటుంది. మరి అర్జున్ వాళ్లను కాపాడుకున్నాడా? లేదా? అనేది తెలుసుకోవాలంటే సినిమా చూడాల్సిందే. ఈ సినిమాలో వసంత్ రవి పర్ఫార్మెన్స్ చాలా బాగుంది. బ్యాక్ గ్రౌండ్ మ్యూజిక్, హారర్ సీన్స్ బాగున్నాయి. పురాణాలకు లింక్ పెట్టి తీసిన కథ ఇది. ఆ లింక్ ఏంటనేది ఇంట్రెస్టింగ్ పాయింట్. హారర్ థ్రిల్లర్స్ ఇష్టపడేవాళ్లకు కచ్చితంగా నచ్చుతుంది.
టీచర్కి యుద్ధం నేర్పిన పాఠం
టైటిల్ : బవాల్
లాంగ్వేజ్ : హిందీ, తెలుగు
కాస్ట్ : వరుణ్ ధావన్, జాన్వీ కపూర్, ముఖేష్ తివారి, మనోజ్, శశి వర్మ, అంజుమన్ సక్సేనా
డైరెక్షన్ : అశ్విని అయ్యర్ తివారి
ప్లాట్ ఫాం : అమెజాన్ ప్రైమ్ వీడియో
అజ్జూ సర్ (వరుణ్) ఓ స్కూల్లో హిస్టరీ టీచర్. అతనికి లక్నోలో చాలా పాపులారిటీ ఉంటుంది. ఎప్పుడూ ఇమేజ్ కాపాడుకోవాలి, పాపులారిటీ పెంచుకోవాలనే ఆలోచనలో ఉంటాడు. అందులో భాగంగానే డబ్బు, సమాజంలో గౌరవం ఉన్న ఫ్యామిలీలో బాగా చదువుకున్న అమ్మాయి (నిషా)ని పెండ్లి చేసుకుంటాడు. తనకి ఫిట్స్ వ్యాధి ఉందని పెండ్లికి ముందే అజ్జూతో చెప్తుంది నిషా. అయినా పర్వాలేదు అంటాడు. కానీ, పెండ్లయిన కాసేపటికి ఆమెకి ఫిట్స్ వస్తాయి. అప్పటినుంచి ఆమెని దూరం పెడతాడు. ఒకరోజు నిషా మీద కోపంతో.. క్లాసులో వరల్డ్ వార్ గురించి డౌట్ అడిగిన అబ్బాయిని కొడతాడు. ఆ అబ్బాయి ఎమ్మెల్యే కొడుకు. దాంతో అజ్జూని సస్పెండ్ చేయమంటాడు ఎమ్మెల్యే. ‘‘నేను మంచి టీచర్ని. కావాలంటే వరల్డ్ వార్ జరిగిన ప్లేస్లకు వెళ్లి పిల్లలకు డిజిటల్ క్లాస్లు చెప్తా” అంటాడు. తనతోపాటు నిషాని కూడా వెంట తీసుకెళ్తాడు. మరి అజ్జూ సర్ మంచి టీచర్ అనిపించుకున్నాడా? అజ్జూ, నిషా కలిసిపోయారా? లేదా? అనేది మిగతా కథ. అయితే, ఈ సినిమాలో వరల్డ్ వార్కి, రియల్ లైఫ్ ఎమోషన్స్కి ముడిపెట్టి కథ చెప్పిన విధానం కొత్తగా ఉంటుంది. డైలాగ్స్ మనసును హత్తుకుంటాయి. వరుణ్, జాన్వీ పర్ఫార్మెన్స్ బాగుంది.
మెసేజ్ ఇచ్చే సస్పెన్స్ థ్రిల్లర్
టైటిల్ : ధూమం
లాంగ్వేజ్ : మలయాళం, కన్నడ, తెలుగు, తమిళం, హిందీ
కాస్ట్ : ఫహద్ ఫాజిల్, అపర్ణ బాలమురళీ, రోషన్ మ్యాథ్యూ, వినీత్, అచ్యుత్ కుమార్, మేబల్ థామస్, అను మోహన్,
డైరెక్షన్ : పవన్ కుమార్
ప్లాట్ ఫాం : అమెజాన్ ప్రైమ్ వీడియో
అవినాశ్ (ఫహద్ ఫాజిల్) ఒక సిగరెట్ కంపెనీలో సేల్స్ హెడ్గా పనిచేస్తుంటాడు. తన తెలివితేటలతో కంపెనీ సేల్స్ పెంచుతాడు. సిగరెట్ కంపెనీ ఎం.డీ సిద్ధార్థ్ (రోషన్ మాథ్యూ) అవినాశ్ని ఉద్యోగిలా కాకుండా ఫ్రెండ్లా చూస్తాడు. అనుకోకుండా వాళ్లిద్దరి మధ్య భేదాభిప్రాయాలు వస్తాయి. దాంతో అవినాశ్ ఉద్యోగానికి రిజైన్ చేస్తాడు. ఆ తర్వాతి రోజు భార్య దియా (అపర్ణ)తో కలిసి కారులో వెళ్తుండగా ఒక వ్యక్తి అటాక్ చేసి డ్రగ్ ఇంజెక్షన్ ఇస్తాడు అవినాశ్కి. మత్తులో నుంచి బయటకు వచ్చేసరికి అవినాశ్ ఒక కొండ ప్రాంతంలో ఉంటాడు. ఒక వ్యక్తి ఫోన్ చేసి ‘‘దియా బాడీకి మైక్రో బాంబ్ ఫిక్స్ చేశా. మేం చెప్పింది చేయకపోతే ఆమె ప్రాణాలు తీస్తాం. కోటి రూపాయలను మేం చెప్పిన అడ్రెస్లో ఇవ్వాల”ని బెదిరిస్తాడు. సిగరెట్ కంపెనీ సీక్రెట్స్ తనకు తెలుసు కాబట్టి సిద్ధార్థే ఈ ట్రాప్లో ఇరికించాడని అనుకుంటాడు అవినాశ్. అవినాశ్ ఆలోచన నిజమైందా? ఆ ట్రాప్ నుంచి ఎలా బయటపడతాడు? అసలు ఈ సినిమా ద్వారా సిగరెట్ స్మోకింగ్ గురించి ఇచ్చే మెసేజ్ ఏంటి? అనే విషయాలు తెలుసుకోవాలంటే సినిమా చూడాల్సిందే. ఇందులో ఫహద్, అపర్ణ, రోషన్ల యాక్టింగ్ బాగుంది. సస్పెన్స్ థ్రిల్లర్గా సాగే ఈ సినిమా స్మోకింగ్ గురించి చాలా విషయాలు తెలియజేస్తుంది. క్లైమాక్స్ సర్ప్రైజ్ చేస్తుంది.
