తమకు నచ్చిన అమ్మాయికి ఒక్కో వ్యక్తి ఒక్కో స్టైల్లో లవ్ ప్రపోజల్ చెబుతుంటారు. లైఫ్ లాంగ్ గుర్తుండిపోయేలా నచ్చిన విధంగా తమ ప్రేమను వ్యక్తపరుస్తుంటారు. కొందరు చాలా డిఫరెంట్ గా ఆలోచించి..తమ ప్రియురాలికి లవ్ ప్రపోజల్స్ చేస్తుంటారు. అచ్చం ఇలాగే ఓ వ్యక్తి తన ప్రియురాలికి లవ్ ప్రపోజల్ చేసి వార్తల్లో నిలిచాడు.
బాలీవుడ్ బాద్ షా షారూఖ్ ఖాన్ మూవీ ‘కుచ్ కుచ్ హోతా హై’ లోని ‘కోయీ మిల్ గయా’ పాటకు స్టెప్పులేస్తూ ఓ వ్యక్తి తన ప్రియురాలికి పెళ్లి ప్రతిపాదన చేశాడు. పారిస్లోని ఈఫిల్ టవర్ ముందు ఈ లవ్ ప్రపోజల్ చేయడం విశేషం. ప్రియుడు డ్యాన్స్ చేస్తూ లవ్ ప్రపోజ్ చేస్తుంటే.. ప్రియురాలు కూడా ఆనందంతో కలిసి స్టెప్పులేసింది. ప్రస్తుతం ఈ వీడియో సోషల్ మీడియాలో వైరల్ అవుతోంది.
ప్రేమ జంట డ్యాన్స్ చేస్తుంటే వారి వెనుకాల కొవ్వొత్తుల వెలుగుల నడుమ ఎర్రని రోజా పూలతో తీర్చిదిద్దిన మ్యారీ మీ అనే సింబల్ కనిపిస్తోంది. 44 సెకన్ల నిడివి కలిగిన ఈ వీడియోను సచిన్ టాండన్ అనే ట్విట్టర్ యూజర్ పోస్ట్ చేశాడు. ఈ నెల 15న పోస్టు చేసిన ఈ వీడియోను వేలాది మంది వీక్షించారు. కొంతమంది అతని క్రియేటివిటీని మెచ్చుకుంటున్నారు. మరికొందరు మాత్రం పబ్లిక్ దృష్టిని మళ్లించడానికే ఇలాంటివి చేస్తారంటూ కామెంట్స్ చేస్తున్నారు.