'కత్తులతో కాదురా.. కంటి చూపుతో చంపేస్తా'.. ఈ డైలాగ్ వినగానే అప్పట్లో సంచలనం సృష్టించిన నరసింహా నాయుడు సినిమానే గుర్తొస్తుంది. ఇప్పుడు జరిగిన ఓ ఘటనను చూస్తే.. ఈ డైలాగ్ని కాస్త 'కత్తితో వేటు వేస్తే.. కంటిని యమపాశంలా మార్చి చంపేస్తా' అని తిరగరాయాల్సి వస్తుందేమో. ఓ మేకను బలి ఇచ్చిన యజమాని చివరికి ప్రాణాలు కోల్పోయాడు. అది కూడా మేక కంటితో.. అదెలాగంటారా.. ఈ వార్త చదవండీ..
ఛత్తీస్ఘడ్ లోని సూరజ్పూర్జిల్లాలోని మదన్పూర్ గ్రామానికి చెందిన 50 ఏళ్ల బగార్రాయ్ తన స్నేహితులతో కలిసి ప్రముఖ ఖోపాథామ్కు వెళ్లాడు. అక్కడ పూజలు నిర్వహించిన తరువాత మేకలను బలి ఇచ్చి, వాటితో కర్రీ వండించాడు. అనంతరం గ్రామస్థులకు వడ్డించాడు.
తింటూ గొంతులో ఇరుక్కుపోయి..
గ్రామస్థులకు వడ్డించాక మిగిలిన వారితో కలిసి ఆయన తినడానికి కూర్చున్నాడు. మటన్లో మేక కనుగుడ్డు కనిపించడంతో నోరూరి చటుక్కున నోట్లో వేసుకున్నాడు. అంతే.. ఆ కనుగుడ్డు ఆయన గొంతులో ఇరుక్కు పోయింది. దీంతో ఊపిరి ఆడక అటూ ఇటూ చాలా కదులుతూ ఇబ్బంది పడ్డాడు. గమనించిన స్థానికులు ఆయన్ని వెంటనే జిల్లా ప్రభుత్వాసుపత్రికి తరలించారు. చికిత్స పొందుతూ బగర్రాయ్ మరణించాడు. కనుగుడ్డు ఇలా ప్రాణాలు తీస్తుందని ఊహించలేకపోయామని బంధువులు రోదించారు. ఈ ఘటన స్థానికంగా కలకలం సృష్టించింది. మేక కంటితో చనిపోయిన ఘటనను ఇదే మొదటి సారిగా చూస్తున్నామని స్థానికులు అంటున్నారు.