బ్రేక్ఫాస్ట్, శ్నాక్ ఏదైనా... రోజూ ఒకేరకంగా తినడానికి ఇష్టపడరు పిల్లలు. అందుకని అప్పుడప్పుడు వాళ్లకోసం కొత్త ఫుడ్ వెరైటీలు చేయాలి. అవి కూడా పిల్లలకు ఎంతో ఇష్టమైన చాక్లెట్స్, ఫ్రూట్స్తో రెసిపీలు చేస్తే వదలకుండా తింటారు. అలాంటిదే చాకో పెంగ్విన్స్. చాక్లెట్, అరటిపండుతో నోరూరించే చాకో పెంగ్విన్ చేయొచ్చు అంటోంది క్లినికల్ న్యూట్రిషనిస్ట్ గురుప్రీత్ కౌర్.
కావాల్సినవి: అరటిపండ్లు- 6, చాక్లెట్ (కరిగించి)- ఒక కప్పు, కొబ్బరి నూనె - ఒక టేబుల్ స్పూన్, క్యాండీ ఐస్- కొన్ని, ఆరెంజ్ జెమ్స్ - కొన్ని.
తయారీ: అరటి పండ్లను తొక్క తీసి పక్కన పెట్టుకోవాలి. కరిగించిన చాక్లెట్, కొబ్బరి నూనెని ఒక గిన్నెలో కలపాలి. అరటిపండు మొదలు, చివరి భాగాలను చాక్లెట్, కొబ్బరినూనె మిశ్రమంలో ముంచాలి. తర్వాత క్యాండీ ఐస్ని అరటిపండు మొదటి భాగం దగ్గర పెంగ్విన్ కన్నులాగ పెట్టాలి. పాదాల కోసం అరటిపండు చివరి భాగంలో ఆరెంజ్ జెమ్స్ పెట్టాలి. ముక్కు కోసం ఆరెంజ్ జెమ్ని రెండుగా కట్ చేయాలి. వీటిని అరగంట ఫ్రిజ్లో పెడితే యమ్మీ చాకో పెంగ్విన్స్ రెడీ.
