- టాయిలెట్ సౌకర్యం కల్పించాలని వేడుకోలు
బెల్లంపల్లి, వెలుగు: స్కూల్లో స్ట్రాంగ్ రూం ఏర్పాటు చేసి అటువైపు ఎవరికీ వెళ్లనీయకపోవడంతో టాయిలెట్ వెళ్లేందుకు విద్యార్థులు నానా ఇబ్బందులు పడుతున్నారు. మంచిర్యాల జిల్లాలోనే అతి పెద్ద పాఠశాలగా పేరుగాంచిన బజార్ ఏరియా జిల్లా పరిషత్ ఉన్నత పాఠశాలలో 527 మంది విద్యార్థులు చదువుతుండగా, 20 మంది టీచర్లు పనిచేస్తున్నారు.
ఈ నెల 21న జిల్లా అడిషనల్ కలెక్టర్(స్థానిక సంస్థలు) బి.రాహుల్ ఆధ్వర్యంలో బెల్లంపల్లి అసెంబ్లీ నియోజకవర్గానికి సంబంధించిన ఎలక్ట్రానిక్ ఓటింగ్ యంత్రాలు, ఈవీఎంలతో పాటు వీవీ ప్యాట్లు భద్రపరిచేందుకు ఈ స్కూల్లోని పలు గదుల్లో స్ట్రాంగ్ రూమ్ ఏర్పాటు చేశారు. దసరా సెలవులు ముగియడంలో గురువారం స్టూడెంట్లు, టీచర్లు స్కూల్కు వచ్చారు.
అయితే బాలుర టాయిలెట్ల వైపు స్ట్రాంగ్రూమ్ ఏర్పాటు చేసి, పరదాలు కట్టి అటువైపు ఎవరికీ అనుమతించకపోవడంతో బాలురు టాయిలెట్వెళ్లలేని పరిస్థితి ఏర్పడింది. దీంతో చాలా మంది మధ్యలోనే ఇండ్లకు వెళ్లిపోయారు. ఎన్నికలు జరిగే వరకు పరిస్థితి ఇలాగే ఉంటే చదువుపై దృష్టి పెట్టలేమని.. స్కూల్లో టాయిలెట్ వెళ్లేందుకు అనుమతించాలని టీచర్లు, స్టూడెంట్లు కోరుతున్నారు.
