- ఎన్నికల్లో విధులు నిర్వహించిన మరుసటి రోజే మృతి
- నేత్రదానం చేసి గొప్ప మనసు చాటుకున్న కుటుంబసభ్యులు
మంచిర్యాల, వెలుగు: గుండెపోటుతో ఇంటిపెద్ద చనిపోగా పుట్టెడు బాధలోనూ ఆయన కుటుంబసభ్యులు ఉదారత చాటుకున్నారు. ఆయన కండ్లను దానం చేశారు. మంచిర్యాల జిల్లా కేంద్రంలోని గోపాలవాడ ప్రాంతానికి చెందిన గడిగొప్పుల సదానందం(46) స్థానిక రామకృష్ణాపురంలోని ప్రభుత్వ పాఠశాలలో ఫిజికల్ డైరెక్టర్(పీడీ)గా పనిచేస్తున్నారు. సోమవారం జరిగిన ఎన్నికల్లో విధులు నిర్వహించిన సదానందం మంగళవారం ఛాతీలో నొప్పిగా ఉందని అవస్థ పడుతుండడంతో, వెంటనే మంచిర్యాలలోని ఓ ఆస్పత్రికి తరలించగా చికిత్స పొందుతూ గుండెపోటుతో చనిపోయారు.
అమెరికాలో ఉంటున్న మృతుని కూతురు, అల్లుడు రావడానికి ఆలస్యం అవుతుండడంతో డెడ్బాడీని కరీంనగర్లోని ప్రతిమ మెడికల్ కాలేజీలో భద్రపరిచారు. ఇంటి పెద్దదిక్కును కోల్పోయిన దుఃఖంలోనూ ఆ కుటుంబసభ్యులు ఇద్దరు అంధులకు చూపు ప్రసాదించాలని ముందుకు వచ్చారు. ఎల్వీ ప్రసాద్ ఐ బ్యాంక్ ప్రతినిధి సహకారంతో బుధవారం సదానందం నేత్రాలను సేకరించారు. హైదరాబాద్ లోని ఐ బ్యాంక్కు తరలించారు. సదానందం నేత్రాలను దానం చేయడానికి అంగీకారం తెలిపిన కుటుంబసభ్యులను సదాశయ ఫౌండేషన్ జాతీయ అధ్యక్షుడు టి.శ్రావణ్ కుమార్, గౌరవ అధ్యక్షుడు సానా రామకృష్ణారెడ్డి అభినందించారు.
