ప్లాస్టిక్ వల్ల పర్యావరణానికే కాదు జంతువులు, పక్షులకు కూడా చాలా నష్టం జరుగుతోంది. ఆ నష్టాన్ని పూడ్చడానికే సాఫ్ట్వేర్ ఉద్యోగాన్ని వదిలేసి ఊరిబాట పట్టాడు అభినవ్ పటేల్. భర్త ఆలోచనకి భార్య నందిని తోడు అయ్యింది. ఇద్దరూ కలిసి బయో క్యారీ బ్యాగ్స్ కంటే ముందే కెమికల్ ఫ్రీ నేచర్ అనే ప్రయత్నం మొదలుపెట్టారు. 2015 లో హోలీ సందర్భంగా ఎకో కలర్స్ తయారుచేశారు. కానీ, ఏడాదికోసారి వచ్చే పండుగ అవడంతో ఆ రంగులకి మార్కెట్లో పెద్దగా ఆదరణ దొరకలేదు. అయినా సరే నిరుత్సాహపడలేదు. ప్రకృతిపై ప్రేమ వీళ్లని ‘ఎకో కవర్స్’ వైపు నడిపించింది. కానీ, అటుగా వెళ్లడానికి అడుగడుగునా ఇబ్బందులు ఎదురయ్యాయి. రీసెర్చ్ కోసం ఏ ఇండస్ట్రీకి వెళ్లినా గేటు లోపలికి రానిచ్చేవాళ్లు కాదు. దాంతో ఎకో కవర్స్ గురించి రీసెర్చ్ చేస్తున్న ఎక్స్పర్ట్స్ని కలిశారు. యూట్యూబ్లో వాటి తయారీకి సంబంధించిన వీడియోలు చూశారు. దాదాపు రెండేళ్లు రీసెర్చ్ చేసి 2018లో ఇంట్లోనే ఎకో కవర్స్ తయారుచేశారు. అది సక్సెస్ కావడంతో ఆర్గానిక్ కవర్ ప్లాంట్ పెట్టాలి అనుకున్నారు. కానీ, చేతిలో డబ్బు లేదు.
తాకట్టు పెట్టి...
కవర్ ప్లాంట్ కోట్లతో కూడుకున్న పని. కానీ, అభినవ్, నందిని దగ్గర అంత డబ్బు లేదు. దాంతో లోన్ కోసం బ్యాంకుల చుట్టూ తిరిగారు. కానీ సాయం చేయడానికి ఏ బ్యాంక్ ముందుకురాలేదు. అయినా వెనకడుగేయలేదు. ప్లాస్టిక్ ఫ్రీ నేచర్ కోసం తన బంగారాన్ని తాకట్టు పెట్టింది నందిని. తన పేరు మీదున్న కొద్దిపాటి భూమిని కూడా అమ్మేసింది. ఆస్తులు తాకట్టు పెట్టి దాదాపు 25 లక్షలు వడ్డీకి తీసుకుని భర్త ఆలోచనకి ప్రాణం పోసింది. జర్మనీ నుంచి మెషిన్ ఇంజిన్ తెప్పించి, ఖర్చు తగ్గించడానికి మిగతా పార్ట్స్ అన్నింటినీ మన దగ్గర తయారుచేయించారు . 2021 ఫిబ్రవరిలో నిజామాబాద్ లక్కంపల్లి సెజ్లో గ్రీన్ అలయెన్స్ బయోటెక్ ప్లాంట్ని మొదలుపెట్టారు.
ఎలా తయారుచేస్తారు?
గ్రీన్ అలయెన్స్లో రోజుకి 16 టన్నులు కవర్లు తయారుచేస్తున్నారు . అచ్చు ప్లాస్టిక్ కవర్లని పోలి ఉన్న ఈ క్యారీ బ్యాగ్స్ని కాకరకాయ, ఆస్ట్రేలియన్ ఆలుగడ్డ, మొక్కజొన్న గంజి, సగ్గుబియ్యంతో తయారు చేస్తున్నారు. సెంట్రల్ పొల్యూషన్ కంట్రోల్ బోర్డ్ ప్రకారం ఇవి భూమిలో 30 నుంచి 180 రోజుల్లో కరిగి ఎరువుగా మారతాయి. వీటితో పాటు పాలిమర్ కవర్లు కూడా ఉంటాయి. వివిధ సైజుల్లో, రకరకాల రంగుల్లో ఉంటాయి ఈ కవర్లు. 25 కిలోల బరువు మోసే కవర్లు కూడా అందుబాటులో ఉన్నాయి. వేడిపదార్థాల కోసం కూడా ప్రత్యేకంగా కవర్లు ఉన్నాయి. కవర్స్తో పాటు పెన్సిళ్లు, పెన్నులు, వెదురు టూత్ బ్రష్లు కూడా తయారవుతున్నాయి ఇక్కడ. భవిష్యత్తులో బయో డీగ్రేడబుల్ ప్లేట్లు, స్పూన్స్, గ్లాసులు కూడా ఉత్పత్తి చేసే ఆలోచనలో ఉన్నారట. ఈ ఇన్నొవేషన్కి రీసెంట్గా ‘వండర్ బుక్ ఆఫ్ ఇంటర్నేషనల్ అవార్డు’ కూడా వచ్చింది.
అందరం కలిసి
దేశవ్యాప్తంగా రోజుకి పదివేల టన్నుల ప్లాస్టిక్ వాడుతున్నాం.ఈ పరిస్థితి ఇలానే కొనసాగితే ఫ్యూచర్లో భూమంతా ప్లాస్టిక్తో నిండిపోతుంది. మన పిల్లలు హాయిగా గాలి పీల్చుకోలేని సిచ్యుయేషన్ వస్తుంది. అందుకే ఇప్పటికైనా ప్లాస్టిక్ వాడకాన్ని తగ్గించాలి. ఆ ఆలోచనతో ఉద్యోగం వదిలేసి సొంతగూటికి వచ్చేశా. అన్ని అడ్డంకుల్ని దాటి నా భార్యతో కలిసి ఈ బయో క్యారీ బ్యాగ్స్ని మార్కెట్లోకి తీసుకొచ్చా. ఉదయం లేచిన దగ్గర్నుంచి రాత్రి పడుకునే వరకు ఎక్కడెక్కడ ప్లాస్టిక్ వాడుతున్నారో వాటి స్థానంలో బయో ఉత్పత్తులు వాడేలా చేయడమే మా లక్ష్యం .అలాగే వీటి తయారీ గురించి.. ప్లాస్టిక్ ప్రత్యామ్నాయాల గురించి యువతలో అవేర్నెస్ కల్పించే ప్రయత్నం కూడా చేస్తున్నాం.
- అభినవ్ పటేల్
::: నిజామాబాద్, వెలుగు