తొర్రూరు (పెద్దవంగర), వెలుగు : భూమి మ్యుటేషన్‌ చేసేందుకు లంచం తీసుకున్న ఓ తహసీల్దార్‌‌‌‌‌‌‌‌ను ఏసీబీ ఆఫీసర్లు రెడ్‌‌‌‌‌‌‌‌హ్యాండెడ్‌‌‌‌‌‌‌‌గా పట్టుకున్నారు. ఏసీబీ వరంగల్ డీఎస్పీ సాంబయ్య తెలిపిన వివరాల ప్రకారం... మహబూబాబాద్‌ జిల్లా పెద్దవంగర మండలంలోని పడమటి తండాకు చెందిన భుక్యా స్వామి ఆరు నెలల కింద చనిపోయాడు. అతడికి గంట్లకుంట గ్రామ శివారులో 3.09 ఎకరాల వ్యవసాయ భూమి ఉంది. ఆ భూమిని తన పేరున మ్యుటేషన్‌ చేసుకునేందుకు స్వామి కుమారుడు భుక్యా బాలు దరఖాస్తుడు చేసుకున్నాడు.
మ్యుటేషన్‌ పూర్తి కావాలంటే రూ. 20 వేలు ఇవ్వాలని తహసీల్దార్‌ వీరగంటి మహేందర్‌ డిమాండ్‌ చేశారు. దీంతో బాలు తన బంధువైన ధరావత్‌ మురళీనాయక్‌‌‌‌‌‌‌‌తో కలిసి ఏసీబీ ఆఫీసర్లకు ఫిర్యాదు చేశాడు. వారి సూచన మేరకు బాలు రూ. 15 వేలు తీసుకొని శుక్రవారం పెద్దవంగర తహసీల్దార్‌ ఆఫీస్‌ వద్దకు వచ్చాడు. డబ్బులను తన డ్రైవర్‌ గౌతమ్‌‌‌‌‌‌‌‌కు ఇవ్వాలని తహసీల్దార్‌ సూచించాడు. దీంతో బాలు డబ్బులను గౌతమ్‌‌‌‌‌‌‌‌కు ఇవ్వగా.. అతడు తహసీల్దార్‌‌‌‌‌‌‌‌కు ఇచ్చాడు. అప్పటికే అక్కడ ఉన్న ఏసీబీ ఆఫీసర్లు తహసీల్దార్‌‌‌‌‌‌‌‌తో పాటు డ్రైవర్‌‌‌‌‌‌‌‌ను రెడ్‌‌‌‌‌‌‌‌హ్యాండెడ్‌‌‌‌‌‌‌‌గా పట్టుకున్నారు. వీరిద్దరినీ ఏసీబీ కోర్టులో హాజరుపరచనున్నట్లు డీఎస్పీ తెలిపారు. దాడుల్లో ఏసీబీ సీఐలు ఎల్. రాజు, ఎస్. రాజు పాల్గొన్నారు.
