వేములవాడ, వెలుగు : గత పదేళ్ల బీఆర్ఎస్ సర్కార్ పాలనలో వేములవాడ నియోజకవర్గం అన్ని రంగాల్లో వెనుకబాటుకు గురైందని, కాంగ్రెస్ ప్రభుత్వంలో వేములవాడ నియోజకవర్గంకి ప్రత్యేక నిధులు కేటాయించాలని అసెంబ్లీ సమావేశాల్లో వేములవాడ ఎమ్మెల్యే అది శ్రీనివాస్ కోరారు. కథలాపూర్, భీమారం, మేడిపల్లి మండలాల ప్రజలకు సాగు, తాగునీరుకు ఎంతో ఉపయోగపడే కలికోట సూరమ్మ చెరువు రిజర్వాయర్ కుడి,ఎడమ కాలువలకు 2018 సంలో గత ప్రభుత్వం హయాంలో శంకుస్థాపనకే పరిమితమైందన్నారు.
వేములవాడ దేవస్థానాన్ని రూ. 400 కోట్లతో డెవలప్ చేస్తామని బీఆర్ఎస్ ప్రభుత్వం హామీ ఇచ్చి మర్చిపోయిందని అన్నారు. ప్రస్తుత కాంగ్రెస్ ప్రభుత్వం అధికారంలోకి వచ్చిన 2 నెలల్లోనే సీఎం రేవంత్ రెడ్డి అధ్యక్షతన వీటీడీఏ సమావేశం ఏర్పాటు చేసి రూ. 20 కోట్ల నిధులను విడుదల చేశారన్నారు. -గుడి చెరువు లో మురికి నీరు కలవకుండా నూతన కాలువ నిర్మాణానికి ఎస్టీపి నిధులను విడుదల చేయాలని కోరారు.
మేడిపల్లి, భీమారం,చందుర్తి మండల ప్రజలకు ఉపయోగపడే మోత్కరావుపేట్, -చందుర్తి రోడ్డుకు అటవీ శాఖ అనుమతులు కల్పిస్తూ రోడ్డు నిర్మాణ పనులు చేపట్టాలని, అలాగే మిడ్ మానేరు నిర్వాసితుల సమస్యల పరిష్కారం కోసం నిధులు మంజూరు చేయాలని కోరారు. -వేములవాడ పట్టణంలో ప్రభుత్వ బాలికల జూనియర్ కళాశాల, పాలిటెక్నిక్, ఐటీఐ కళాశాలలు, మేడిపల్లి, భీమారం మండలాలకు ప్రభుత్వ జూనియర్ కళాశాలలను మంజూరు చేయాలని కోరారు.
