బజార్ హత్నూర్, వెలుగు : గిరిజనులలో హక్కుల చైతన్యాన్ని నింపి, ‘జల్‌-జంగల్‌-జమీన్‌’ నినాదంతో పోరాడిన అమరవీరుడు కుమరం భీమ్ స్ఫూర్తితో ప్రతి ఒక్కరూ కలిసికట్టుగా ముందుకు సాగాలని ఆదిలాబాద్ ఎంపీ గోడం నగేశ్ పిలుపునిచ్చారు. ఆదిలాబాద్ జిల్లా బజార్ హత్నూర్ మండల కేంద్రంలో కొత్తగా ఏర్పాటు చేసిన కొమరం భీమ్ విగ్రహాన్ని ఆదివారం ఆయన ఆవిష్కరించారు.
వివిధ గ్రామాలకు చెందిన ఆదివాసీలు గుస్సాడీ వేషధారణతో, సంప్రదాయ నృత్యాలు, ఆటపాటలతో ఎంపీకి ఘన స్వాగతం పలికారు. ఈ సందర్భంగా ఎంపీ మాట్లాడుతూ గిరిజనుల ఆత్మగౌరవ పోరాటానికి కొమురం భీమ్ అమరత్వమే నిదర్శనమని కొనియాడారు.
ఈ కార్యక్రమంలో బీజేపీ రాష్ట్ర కౌన్సిల్‌ సభ్యుడు తాటిపల్లి గంగాధర్‌ రావు, మాజీ రైల్వే బోర్డు సభ్యుడు గుండ్ల వెంకటరమణ, సర్పంచ్ లు సాయన్న, జలై జాకు, నాయకులు మెస్రం జంగు బాబు, అల్కా గణేశ్, పీఏసీఎస్ చైర్మన్‌ వెంకన్న, మాజీ జడ్పీటీసీ కొత్త శంకర్ తదితరులు పాల్గొన్నారు.
