- ఇండియాలోనూ దాదాపు 250 ఫ్లైట్స్పై ప్రభావం
- సాఫ్ట్ వేర్ అప్ డేట్ చేసి తిరిగి ప్రారంభిస్తున్నట్లు వెల్లడి
- సర్వీసులు రద్దు కాలేదు.. లేటవుతున్నాయని ఇండిగో, ఎయిర్ ఇండియా క్లారిటీ
న్యూఢిల్లీ/వాషింగ్టన్: ఎయిర్ బస్ సర్వీసులకు తీవ్ర అంతరాయం ఏర్పడింది. తీవ్రమైన సోలార్ రేడియేషన్ కారణంగా ఎయిర్ బస్ లలో ఫ్లైట్ కంట్రోల్ డాటా తొలగిపోయే అవకాశం ఉందని బయటపడింది. ఏ320 విమానాలకు ఈ సమస్య పొంచి ఉందని గుర్తించింది. దీంతో ఈ ముప్పును తొలగించేందుకు సాఫ్ట్ వేర్ అప్ డేట్ చేయాలని ఫెడరల్ ఏవియేషన్ అడ్మినిస్ట్రేషన్ (ఎఫ్ఏఏ) సూచించింది.
ఈ సూచనలను అమలు చేసే క్రమంలో ప్రపంచవ్యాప్తంగా పలు విమాన సేవలు నిలిచిపోయాయి. ఏ320 మోడల్కు చెందిన దాదాపు 6వేల విమానాలపై ఎఫెక్ట్ పడింది. భారత్లో ఈ మోడల్ విమానాలు 560 వరకు ఉండగా.. అందులో దాదాపు 250 విమానాల్లో సాఫ్ట్ వేర్ అప్ డేట్ చేయాలని డీజీసీఏ నిర్ణయించింది.
సాఫ్ట్ వేర్ అప్డేట్ కారణంగా విమాన సర్వీసులు కొంత ఆలస్యమవుతున్నాయని ఎయిర్ బస్ సీఈవో గియోమ్ ఫౌరీ ఒక ప్రకటనలో పేర్కొన్నారు. ‘‘ఎయిర్ బస్ సర్వీసుల్లో సాఫ్ట్ వేర్ అప్ డేట్ చేస్తున్నాం. దీనివల్ల మా కస్టమర్లు, ప్యాసింజర్లకు కాస్త ఇబ్బంది తలెత్తుతున్నది. వారందరికీ క్షమాపణలు చెప్తున్నాను.
వారి భద్రత మాకు ముఖ్యం. వీలైనంత త్వరగా సర్వీసులను తిరిగి ప్రారంభమయ్యేలా చూస్తున్నాం” అని పేర్కొన్నారు. ఇటీవల జెట్ బ్లూ విమానం ఆకాశంలో ఉండగా.. అకస్మాత్తుగా కిందికి రావడంతో సమస్యను ఎయిర్ బస్ గుర్తించింది.
భారత్లో ఎయిర్ ఇండియా, ఇండిగో వద్ద ఏ320 మోడల్ సర్వీసులు ఎక్కువగా ఉన్నాయి. ఇందులో 250 వరకు విమానాలకు అంతరాయం ఏర్పడింది. వాటిలోని సాఫ్ట్ వేర్ అప్ డేట్చేస్తున్నట్లు ఆయా సంస్థలు పేర్కొన్నాయి. సర్వీసులు రద్దు కాలేదని.. లేట్ అవుతున్నాయని తెలిపాయి.
