మెదక్, వెలుగు: ప్రధాన పార్టీలన్నీ మహిళాఓటర్లను ప్రసన్నం చేసుకునేందుకు ఇప్పటి నుంచే ప్రయత్నాలు ప్రారంభించాయి. మెదక్ లోక్సభ నియోజకవర్గంలోని ఆరు అసెంబ్లీ సెగ్మెంట్లలో మహిళాఓటర్లే ఎక్కువగా ఉండడం ఇందుకు కారణం. ఈ నియోజకవర్గం పరిధిలో సిద్దిపేట, మెదక్, నర్సాపూర్, సంగారెడ్డి, పటాన్ చెరు, దుబ్బాక, గజ్వేల్ ఉన్నాయి. ఇందులో పటాన్ చెరు మినహా మిగిలిన ఆరు సెగ్మెంట్లలో మహిళా ఓటర్లే ఎక్కువ మంది ఉన్నారు.
ఓటరు జాబితాల సవరణ అనంతరం నియోజకవర్గంలో 18,12,858 మంది ఓటర్లకు గాను పురుషులు 8,95,777 మంది, మహిళలు 9,16,876 మంది, ట్రాన్స్ జెండర్లు 205 మంది ఉన్నారు. పురుషుల కంటే మహిళా ఓటర్లు 21,009 మంది ఎక్కువగా ఉన్నారు. ఓటర్లు ఎక్కువ గా ఉండడమే కాకుండా పోలింగ్లో నూ మహిళలే క్రియాశీలంగా పాల్గొంటారు. ఇదివరకు జరిగిన అన్ని ఎన్నికల్లో మహిళల పోలింగ్ శాతమే అధికంగా నమోదయ్యింది. దీంతో మహిళల మద్దతు ఉంటే గెలుపు సులువు అవుతుందని పార్టీలు నమ్ముతున్నాయి. ఈ క్రమంలో లోక్ సభ ఎన్నికలలో విజయం కోసం కాంగ్రెస్, బీజేపీ, బీఆర్ ఎస్ మహిళ ఓటర్ల మద్దతు కూడగట్టే ప్రయత్నం చేస్తున్నాయి.
అందరి ఆశలు వాళ్లమీదే
కాంగ్రెస్ పార్టీ మహిళలకు ఫ్రీ బస్ సౌకర్యం కల్పించడంతోపాటు, గ్యాస్ సిలిండర్ రూ.500కే ఇస్తోంది. ఇందిరమ్మ ఇండ్లు మహిళల పేరు మీదే ఇస్తామని ప్రకటించింది. ఆరు గ్యారంటీల్లో భాగంగా మహాలక్ష్మి స్కీమ్ కింద ప్రకటించిన రూ. 2500 పార్లమెంట్ ఎన్నికల తర్వాత అమలు చేయనున్నట్టు చెప్తోంది. కేంద్రంలో కాంగ్రెస్అధికారంలోకి వస్తే పేద మహిళలకు ఏటా రూ.లక్ష ఇస్తామని మ్యానిఫెస్టోలో చెప్పడంతో మహిళా ఓటర్ల మద్దతు తమకే లభిస్తుందని ఆశిస్తోంది. ఈ అంశాలను పార్టీ ఎన్నికల్లో విస్తృతంగా ప్రచారం చేయనుంది. బీఆర్ఎస్తమ హయాంలో ఇచ్చిన స్కీమ్లు, కాంగ్రెస్ఇచ్చిన హామీల అమలులో వైఫల్యాలను ప్రచారం చేస్తోంది. బీజేపీ కేంద్రప్రభుత్వ పథకాలను ప్రచారం చేయడంతో పాటు రామాలయం సెంటిమెంట్ మీద ఆశలు పెట్టుకుంది.
