- గన్తో బెదిరించి గొలుసు లాక్కెళ్లేందుకు ప్రయత్నం
- ఎదురుదాడి చేసి ఇద్దరు దొంగలను పట్టుకున్న ఆఫీసర్.. ఢిల్లీలో ఘటన
న్యూఢిల్లీ : ఇద్దరు చైన్ స్నాచర్లు ఏకంగా పోలీస్ స్పెషల్ ఫోర్స్ లో ఎన్కౌంటర్ స్పెషలిస్ట్ ఆఫీసర్నే టార్గెట్ చేశారు. ఈవినింగ్ వాకింగ్ వెళ్లిన ఆయన మెడలోంచి గోల్డ్ చైన్ చోరీకి యత్నించారు. ఆ పోలీస్ ఆఫీసర్ ఎదురుదాడి చేసి ఇద్దరినీ పోలీసులకు పట్టించారు. దేశ రాజధాని ఢిల్లీలో సోమవారం సాయంత్రం ఈ ఘటన జరిగింది. చాణక్యపురి ప్రాంతంలో ఉండే ఢిల్లీ పోలీస్ స్పెషల్ సెల్లో ఎన్కౌంటర్ స్పెషలిస్ట్ అయిన వినోద్ బడేలా.. దగ్గరలోని నెహ్రూ పార్క్లో వాకింగ్చేస్తున్నారు. ఆయన పోలీస్ అని తెలియని ఇద్దరు చైన్ స్నాచర్లు.. గన్ తో వచ్చి బెదిరించారు.
మెడలోని గొలుసు తీసివ్వాలని, లేదంటే కాల్చేస్తామని హెచ్చరించారు. ఇంతలోనే ఆ ఇద్దరిలో ఒకరు ఆఫీసర్ ముఖంపై పంచ్ ఇచ్చాడు. వినోద్ కిందపడిపోవడంతో ఆయన మెడలోంచి చైన్ లాక్కుని పరిగెత్తారు. వెంటనే తేరుకున్న ఆ ఆఫీసర్ వాళ్లను వెంబడించి ఒకరిని పట్టుకుని పోలీసులకు కాల్ చేశారు. స్పాట్ కు వచ్చిన పోలీసులు రెండో నిందితుడిని కూడా గుర్తించి అరెస్ట్ చేశారు. కాగా, వినోద్ బడేలా ఎన్నో సీక్రెట్ ఆపరేషన్స్కు నాయకత్వం వహించారు. ఆయన టెర్రరిజం నిరోధక కార్యకలాపాల్లోనూ పాల్గొన్నారు.
