బెంగుళూర్: వివాహేతర సంబంధానికి మరో ప్రాణం బలైంది. క్షణిక సుఖం కోసం వెళ్లి ఓ వ్యక్తి ప్రాణాలు పొగొట్టుకున్నాడు. తన కూతురితో వివాహేతర సంబంధం పెట్టుకున్నాడని తీవ్ర ఆగ్రహానికి గురైన మహిళ కుటుంబ సభ్యులు ఆమె ప్రియుడిని దారుణంగా కొట్టి చంపేశారు. స్తంభానికి కట్టేసి గొడ్డును బాదినట్లు బాడటంతో ఆ దెబ్బలు తాళలేక ప్రాణాలు విడిచాడు. ఈ ఘటన కర్నాటక రాష్ట్రంలోని బీదర్ జిల్లాలో జరిగింది. మహిళ కుటుంబ సభ్యులు వ్యక్తిని కొట్టిన వీడియో సోషల్ మీడియాలో వైరల్గా మారింది.
వివరాల ప్రకారం.. మహారాష్ట్రకు చెందిన విష్ణు (27) బీదర్ జిల్లాలోని చింతకి గ్రామంలో నివసిస్తున్నాడు. అతడికి పెళ్లై, పిల్లలున్న పూజ అనే మహిళతో అక్రమ సంబంధం ఉంది. ఈ క్రమంలో కొద్దిరోజుల క్రితం పూజా తన తల్లిగారింటికి ఇంటికి వెళ్లింది. దీంతో ప్రియురాలిని కలిసేందుకు విష్ణు 2025, అక్టోబర్‌ 21న ఆమె గ్రామానికి వెళ్లాడు.
ఈ క్రమంలో విష్ణును చూసిన పూజ తండ్రి, ఆమె సోదరుడు అతడిని పట్టుకుని ఓ స్తంభానికి కట్టేసి కర్రలతో దారుణంగా కొట్టారు. దీంతో అతడు ప్రాణాలు కోల్పోయాడు. విష్ణుపై పూజ కుటుంబ సభ్యులు విచక్షణరహితంగా దాడి చేసిన వీడియో సోషల్ మీడియాలో వైరల్గా మారింది. ఈ ఘటనపై పోలీసులు కేసు నమోదు చేసి దర్యాప్తు చేపట్టారు.
