మార్కెట్లోకి కొత్త గాడ్జెట్, స్మార్ట్ఫోన్... ఏది రాబోతున్నా సరే అందులో కొత్త అప్డేట్స్, ఫీచర్లు ఏమేం ఉన్నాయని ఆరా తీస్తుంటారు చాలామంది. అలాంటి వాళ్లకు ఇప్పుడొచ్చిన కొత్త గాడ్జెట్స్ ఇంట్రస్టింగ్గా అనిపించొచ్చు. ఆండ్రాయిడ్ 13, రియల్మి కంపెనీ స్మార్ట్హోమ్ గాడ్జెట్లు, వాట్సాప్లో వ్యాక్సిన్ సర్టిఫికెట్ డౌన్లోడ్, బ్యాక్డ్రాప్ వాయిస్ మెసేజ్ ఫీచర్లు అలాంటివే...తక్కువ ధరకే అన్ని ఫీచర్లు ఉన్న స్మార్ట్ఫోన్లు, టీవీలను అందిస్తున్న రియల్మి కంపెనీ ఈ ఏడాది స్మార్ట్హోమ్ గాడ్జెట్లని తీసుకొస్తోంది. స్మార్ట్ డోర్బెల్ నుంచి ఎయిర్ప్యూరిఫయర్ వరకు అన్నీ స్మార్ట్ ఫీచర్లు ఉన్న గాడ్జెట్లని రిలీజ్ చేయబోతోంది ఈ సంస్థ.
స్మార్ట్ డోర్బెల్ కెమెరా
ఈ గాడ్జెట్లో మైక్రోఫోన్తో పాటు స్పీకర్ ఉంటుంది. దాంతో తలుపు తీయకుండానే డోర్ బయట ఉన్న వాళ్లతో మాట్లాడొచ్చు. ఈ బెల్ని ఇంట్లో ఎక్కడైనా పెట్టుకోవచ్చు. ఈ గాడ్జెట్ స్పెషాలిటీ ఏమంటే.... వైఫై కనెక్షన్తో పనిచేస్తుంది. ఈ డోర్బెల్ని వైఫైతో రియల్మి లింక్ యాప్లో కనెక్ట్ చేస్తే ఎక్కడి నుంచైనా దీన్ని ఆపరేట్ చేయొచ్చు.
స్మార్ట్ టెంపరేచర్ సెన్సర్
రూమ్లో ఎంత వేడి ఉంది? అనేది చెప్తుంది ఇది. టెంపరేచర్ ఒక లెవల్కి వెళ్లినప్పుడు ఈ సెన్సర్ సాయంతో ఏసీని ఆన్ చేయొచ్చు. ఆఫ్ చేయొచ్చు. అంతేకాదు రూమ్ హీటర్ లేదా ఫ్యాన్ని ఆన్, ఆఫ్ చేయొచ్చు.
స్మార్ట్ ఎయిర్ ప్యూరిఫయర్
ఇంట్లోని గాలిని శుభ్రం చేసేందుకు ఎయిర్ప్యూరిఫయర్స్ అవసరమైతాయి. రియల్మి తీసుకొస్తున్న స్మార్ట్ ఎయిర్ ప్యూరిఫయర్లో పెద్ద డిస్ప్లే ఉంటుంది. దాంతో ఎయిర్ క్వాలిటీ తెలుసుకోవచ్చు కూడా.
స్మార్ట్ డోర్ సెన్సర్
ఇంటి లోపలి తలుపులకి వీటిని ఏర్పాటు చేయాలి. ఈ సెన్సర్లో ప్రోగ్రాం సెట్ చేసుకుంటే చాలు... ఇంట్లోని లైట్స్, ఫ్యాన్, ఇతర వస్తువుల్ని కూడా స్మార్ట్గా ఆపరేట్ చేయొచ్చు.
బ్యాక్డ్రాప్లో వాయిస్ మెసేజ్
కొత్త ఏడాది కానుకగా యూజర్లకి కొత్త ఫీచర్లు అందించబోతోంది వాట్సాప్. త్వరలోనే బ్యాక్గ్రౌండ్లో వాయిస్ మెసేజ్లను వినేందుకు ఉపయోగపడే ఫీచర్ తీసుకొస్తోంది. ఈ ఫీచర్ సాయంతో ఆయా వాట్సాప్ చాట్లని క్లోజ్చేసినా కూడా వాళ్లు పంపిన వాయిస్ మెసేజ్లని వినొచ్చు. అంతేకాదు ఈ మెసేజ్ ప్లే అవుతుంటే పాజ్ చేసుకోవచ్చు కూడా. టెస్టింగ్ స్టేజ్లో ఉన్న ఈ ఫీచర్ గనుక అందుబాటులోకి వస్తే... వాయిస్ మెసేజ్ వింటూనే వేరేవాళ్లతో చాట్ చేసుకోవచ్చు. అయితే, వాట్సాప్ నుంచి బయటికి వచ్చినప్పుడు ఆటోమెటిక్గా వాయిస్ మెసేజ్ ప్లే ఆగిపోతుంది.
వాట్సాప్లో వ్యాక్సిన్ సర్టిఫికెట్
కరోనా వ్యాక్సిన్ సర్టిఫికెట్ డౌన్లోడ్ చేసుకునేందుకు ‘కొవిన్’ వెబ్సైట్లోకి వెళ్లాలి. అయితే, వాట్సాప్ ఉంటే చాలు వ్యాక్సిన్ సర్టిఫికెట్ డౌన్లోడ్ చేసుకోవచ్చు. వ్యాక్సిన్ సర్టిఫికెట్ డౌన్లోడ్ చేసుకునే ఫీచర్ తెచ్చింది వాట్సాప్. అదెలాగంటే... వ్యాక్సిన్ వేసుకున్నప్పుడు ఇచ్చిన మొబైల్ నెంబర్నుంచి 9013151515 నెంబర్ వాట్సాప్కు ‘సర్టిఫికెట్’ అని మెసేజ్ పంపాలి. వెంటనే రిజిస్టర్డ్ మొబైల్ నెంబర్కి ఆరు అంకెల ఓటీపి వస్తుంది. మూడు నిమిషాల్లోపు ఈ ఓటీపి ఎంటర్ చేయాలి. తర్వాత ఆ ఫోన్ నెంబర్ మీద వ్యాక్సిన్ వేసుకున్న వాళ్ల పేర్లు వస్తాయి. వాటిలో ఎవరి సర్టిఫికెట్ కావాలో వాళ్ల సీరియల్ నెంబర్ ఎంటర్ చేస్తే, కొవిడ్ వ్యాక్సిన్ సర్టిఫికెట్ పీడిఎఫ్ ఫైల్ వస్తుంది. ట్రావెలింగ్ చేసేవాళ్లకు వ్యాక్సిన్ ప్రూఫ్ చూపించాల్సి వచ్చినప్పుడు ఈ ఫీచర్ చాలా ఉపయోగ పడుతుంది.
ఆండ్రాయిడ్ 13లో కొత్త ఫీచర్లు
స్మార్ట్ఫోన్తో క్యుఆర్కోడ్ స్కాన్ చేసి చిటికెలో డిజిటల్ పేమెంట్స్ చేస్తున్నారంతా. అంతేకాదు క్యుఆర్ కోడ్ సాయంతో రెస్టారెంట్లలో ఫుడ్ మెనూ తెలుసుకుంటున్నారు కూడా. కొత్తగా రాబోతున్న ఆండ్రాయిడ్ 13లో క్యుఆర్ కోడ్ ఫీచర్ ఉండనుంది. క్యుఆర్కోడ్ షేరింగ్తో పాటు స్కానింగ్ ఫీచర్లని యూజర్లకి అందించనుంది గూగుల్. ఈ ఫీచర్ ఉంటే, ఫోన్ని అన్లాక్ చేయకుండానే క్యుఆర్ కోడ్ని స్కాన్ చేయొచ్చు. అంతేకాదు ఈ ఫీచర్ సింబల్ నోటిఫికేషన్లలో కనిపిస్తుంది కూడా. ఈ ఫీచర్ శామ్సంగ్ గెలాక్సీ ఫోన్లలో ఉంది. దాంతో శామ్సంగ్ కంపెనీ నుంచి ఈ కొత్త అప్డేట్ని యూజర్లకి అందించాలనే ఆలోచనలో ఉంది గూగుల్.
