రూపాలి గంగూలీ.. హిందీ టెలివిజన్ నటి. వయసు నలభై నాలుగేండ్లు. రెమ్యూనరేషన్ అక్షరాల మూడు లక్షలు. వారానికో, నెలకో కాదు కేవలం ఒక్క ఎపిసోడ్కి. అది కూడా ముగ్గురు పిల్లల తల్లి క్యారెక్టర్ చేస్తున్నందుకు. పైగా అందులో ఇద్దరి పిల్లల వయసు పాతికేండ్లకి పైనే ఉంది. అయితే కచ్చితంగా ఏదో స్టార్ ఫ్యామిలీలో మెంబర్ అనుకుంటే పొరపాటే. కేవలం రూపాలి యాక్టింగ్ స్కిల్స్ తనని ఇండియన్ టెలివిజన్లోనే హయ్యెస్ట్ రెమ్యునరేషన్ తీసుకుంటున్న స్టార్గా నిలబెట్టాయి. ఎలాంటి సీన్ అయినా తన కళ్లతోనే ఎక్స్ప్రెషన్స్ పలికించే రూపాలీ రియల్ కథ ఇది.
‘అనుపమ..’ హిందీ స్టార్ ప్లస్లో జులై 13, 2020 న ఎలాంటి ఎక్స్పెక్టేషన్స్ లేకుండా లాంఛ్ అయిన సీరియల్. సినిమాలకి ఏమాత్రం తీసిపోని హిందీ సీరియల్ కథల్లో ఇదొక ప్రయోగం. పెద్దగా చదువుకోలేదని తల్లిని తక్కువ చేసే పెద్దకొడుకు, కూతురు. కోడలిని వంటింటి కుందేలుగానే చూడాలనుకుంటుంది అత్త. భార్యని చిన్నచూపు చూసే భర్త.. పైగా అతని జీవితంలో మరో అమ్మాయి. వీటన్నింటి మధ్య తనకిష్టమైన డాన్స్ని వదిలేసి నలిగిపోయే హౌస్వైఫ్ కథే ఈ సీరియల్. ఇలాంటి కాన్సెప్ట్తో ఇంతకుముందూ సీరియల్స్ వచ్చాయి. కానీ, వాటన్నింటికీ ఇది పూర్తి డిఫరెంట్. అలా అనుపమ క్యారెక్టర్ని మలిచాడు డైరెక్టర్. ఆత్మాభిమానంతో తన ఇరవై ఐదేండ్ల పెండ్లి బంధాన్ని తెంచుకోవడానికి ఆమె పడే సంఘర్షణ. దాన్నుంచి బయటికొచ్చి ఆమె సాధించిన విజయాలు చాలామందికి సెల్ఫ్ కాన్ఫిడెన్స్ ఇస్తాయి. అనుపమ క్యారెక్టర్ ‘విడాకులపై’ ఉన్న తప్పుడు అభిప్రాయాల్ని ప్రశ్నిస్తుంది కూడా. అందుకే టీఆర్పీలో దూసుకెళ్తోంది ఈ సీరియల్. అయితే కథ ఎంత అద్భుతంగా రాసుకున్నా..దాన్ని జనాలకి కనెక్ట్ చేయాల్సిన బాధ్యత నటీనటులదే. ఆ విషయంలో రూపాలి మెచ్చుకోవాల్సిందే.
నాలుగేండ్లకే నటించి..
రూపాలి గంగూలీ తండ్రి అనిల్ గంగూలీ 1970– 1990 ల్లో ఎన్నో సూపర్ హిట్ బాలీవుడ్ సినిమాల్ని డైరెక్ట్ చేశాడు. స్ర్కీన్ రైటర్గానూ మంచి పేరు తెచ్చుకున్నాడు. దాంతో చిన్నప్పట్నించీ ఇండస్ట్రీపై ఒక అవగాహన ఉంది రూపాలికి. తండ్రితో కలిసి షూటింగ్స్కి వెళ్లడం వల్ల యాక్టింగ్పైనా ఇంట్రెస్ట్ వచ్చింది ఆమెకి. కానీ, వీటన్నింటికన్నా ముందు నాలుగేండ్ల వయసులోనే తండ్రి డైరెక్షన్లో ఒక చిన్న రోల్ చేసింది. ఏడేండ్ల వయసులో ‘ సాహెబ్’ ఫిల్మ్తో చైల్డ్ ఆర్టిస్ట్గా అందరి మనసూ దోచుకుంది. పదమూడేండ్లకే బెంగాలీ సూపర్ హిట్ సినిమా ‘బలిదాన్’ లోనూ హీరోయిన్గా ఛాన్స్ కొట్టేసింది. ఆ తరువాత వరుసగా అవకాశాలు వచ్చినప్పటికీ.. చదువుపై కాన్సన్ట్రేట్ చేయాలనుకుంది. దానికి కారణం తండ్రి అనిల్ గంగూలీ.
పెద్ద సినిమాల్లో అవకాశాలు వస్తున్నాయి. కానీ, బిజీ షెడ్యూల్స్ వల్ల రూపాలి చదువు డిస్టర్బ్ అయింది. దాంతో చదువా? యాక్టింగా? అన్న సందిగ్ధంలో పడింది. ఆ టైంలో రూపాలి తండ్రి ‘యాక్టింగ్ వైరస్ లాంటిది..అది అంత ఈజీగా వదలదు. కొన్నాళ్లు బ్రేక్ తీసుకో, గ్రాడ్యుయేషన్ తర్వాత యాక్టింగ్ వైపు వెళ్ల’ మని చెప్పాడట. దాంతో యాక్టింగ్ని పక్కనపెట్టి కాన్సన్ట్రేషన్ అంతా చదువుపైనే పెట్టింది రూపాలి. హోటల్ మేనేజ్మెంట్ పూర్తిచేసింది. థియేటర్ ఆర్ట్స్ కూడా చేసింది. ఆ తరువాత మోడలింగ్లో అడుగుపెట్టింది.
మోడలింగ్లో..
కమర్షియల్ యాడ్స్లో రూపాలిని చూసి 2000 వ సంవత్సరంలో ‘సుకన్య’ సీరియల్ టీమ్ అప్రోచ్ అయింది. ఆ తర్వాతి రెండేళ్లకి ‘దిల్ హై కి మాన్తా నహీ’ సీరియల్లో డ్యూయెల్ రోల్ చేసే అవకాశం వచ్చిందామెకి. ‘జిందగీ, తేరి మేరి కహానీ’ సీరియల్స్లోనూ మెయిన్ లీడ్గా చేసింది. కానీ, ఆ సీరియల్స్ పెద్దగా నడవకపోవడంతో రూపాలికి గుర్తింపు రాలేదు. పైగా రానురాను పాజిటివ్ క్యారెక్టర్స్ బోర్ అనిపించాయి ఆమెకి. దాంతో నెగెటివ్ షేడ్స్ ఉన్న క్యారెక్టర్స్ వైపు అడుగులేసింది. అలా హిందీ ఆల్ టైం సూపర్ హిట్ సీరియల్ ‘సంజీవని’లో ఆమె చేసిన సిమ్రన్ క్యారెక్టర్ బాగా హిట్ అయింది. ఆ క్యారెక్టర్కిగాను ఇండియన్ టెలీ అవార్డ్స్కి కూడా నామినేట్ అయింది రూపాలి. ఆ తరువాత తన కెరీర్ని మలుపు తిప్పిన మరో క్యారెక్టర్ ‘ సారాభాయ్ వర్సెస్ సారాభాయ్’ సీరియల్లోని మోనీష. మోనీష పాత్రలో రూపాలి చేసిన కామెడీ చిన్నాపెద్దా అందర్నీ టీవీలకి అతుక్కుపోయేలా చేసింది. దాంతో మరిన్ని అవకాశాలు క్యూ కట్టాయి. ఆ సీరియల్ సెకండ్ సీజన్లోనూ రూపాలి నటించింది. ఆ తరువాత పెండ్లి చేసుకొని, యాక్టింగ్కి బ్రేక్ వేసింది.
రియాలిటీ షోల్లో...
హిందీ బిగ్బాస్ సీజన్–1లో పార్టిసిపేట్ చేసి టాప్–5 వరకు చేరుకుంది. ఆ తర్వాత ‘జరా నాచ్కే దిఖా’ అనే డాన్స్ రియాలిటీ షోలోనూ పార్టిసిపేట్ చేసింది. ‘ఖత్రోంఖి ఖిలాడీ’ సీజన్–2లోనూ రిస్కీ ఫీట్లతో అలరించింది. ‘కిచెన్ ఛాంపియన్–2’, ‘మీతీ చూరీ నెంబర్–1’ షోల్లో కంటెస్టెంట్గా, ‘బిగ్కోప్’ అనే షోలో హోస్ట్గానూ మెప్పించింది రూపాలి.
పన్నెండేండ్ల స్నేహం..
రూపాలి తన కెరీర్ స్టార్టింగ్లో అశ్విన్ కే వర్మ డైరెక్ట్ చేసిన ఒక యాడ్లో నటించింది. ఆ తర్వాత కొన్నాళ్లకు అశ్విన్ యూఎస్ వెళ్లి , అక్కడే సెటిలయ్యాడు. కానీ, వాళ్ల పరిచయం కొన్నాళ్లకి స్నేహంగా మారింది. అలా పన్నెండేండ్లు స్నేహితులుగా ఒకరినొకరు అర్థం చేసుకున్నాక పెండ్లికి రెడీ అయ్యారు. పెండ్లి తర్వాత అశ్విన్ రూపాలి కోసం జాబ్ని వదిలేసి ముంబై షిఫ్ట్ అయ్యాడు. ‘నా కాన్ఫిడెంట్, ఫిలాసఫర్, గైడ్ అన్నీ నా భర్తే’ అంటుంది రూపాలి. అయితే , పెండ్లి తర్వాత దాదాపు ఏడేండ్లు ఇండస్ట్రీకి దూరంగా ఉంది రూపాలి. కొడుకు పుట్టాక, యాక్టింగ్ వైపు రావాలన్న ఆలోచననే మర్చిపోయిందట. ఆ టైంలోనే బెంగాలీ షో ‘ఇంద్రాణి హైదర్స్’కి రీమేక్గా వస్తున్న ‘అనుపమ’ కథ విని, మొదట వద్దనుకున్నా.. భర్త కన్విన్స్ చేయడంతో అనుపమగా అందరి ముందుకొచ్చింది. ఈ సీరియల్లోని ప్రతీ సీన్ని తన నేచురల్ యాక్టింగ్తో ప్రాణం పోసింది. కథక్ డాన్సర్గానూ మంచి మార్కులు వేయించుకుంది.