శ్రీనగర్: అసెంబ్లీ ఎన్నికల వేళ జమ్మూ కాశ్మీర్లో తీవ్ర విషాద ఘటన చోటు చేసుకుంది. ఎన్నికల విధుల్లో పాల్గొనేందుకు వెళ్తోన్న ఆర్మీ జవాన్ల బస్సు అదుపు తప్పి 40 అడుగుల లోయలో పడిపోయింది. జమ్మూ కాశ్మీర్‌లోని బుద్గామ్ జిల్లాలో జరిగిన ఈ ఘటనలో మొత్తం ముగ్గురు సైనికులు మరణించగా.. మరో 32 మంది జవాన్లు గాయపడ్డట్లు తెలుస్తోంది. ఇందులో ఆరుగురి పరిస్థితి విషమంగా ఉన్నట్లు ఆర్మీ అధికారులు వెల్లడించారు. కాగా, జమ్మూ కాశ్మీర్లో అసెంబ్లీ ఎన్నికల ప్రక్రియ కొనసాగుతోన్న విషయం తెలిసిందే.
మొత్తం మూడు దశల్లో ఎన్నికలు నిర్వహిస్తుండగా.. ఇప్పటికే ఫస్ట్ ఫేజ్ పోలింగ్ పూర్తి అయ్యింది. ఈ నెల (సెప్టెంబర్) 25న రెండో దశ పోలింగ్ జరగనుంది. ఈ నేపథ్యంలో ఎన్నికల విధుల్లో పాల్గొనేందుకు బార్డర్ సెక్యూరిటీ ఫోర్స్ (బీఎస్ఎఫ్) జవాన్ల కాన్వాయ్ శుక్రవారం బయలుదేరింది. ఈ క్రమంలో బుద్గామ్ జిల్లాలో 35 మంది జవాన్లు ప్రయాణిస్తోన్న ఓ బస్సు అదుపు తప్పి 40 అడుగుల లోయలో పడిపోయింది. ఈ ఘటనలో ముగ్గురు జవాన్లు ఘటన స్థలంలోనే మృతి చెందగా.. మిగిలిన సైనికులు గాయపడ్డారు.
ALSO READ | బెంగాల్లో ఎంపీలు, ఎమ్మెల్యే ప్రయాణిస్తున్న బోటు బోల్తా
గమనించిన స్థానికులు వెంటనే అధికారులకు సమాచారం అందించి ఘటన స్థలంలో సహయక చర్యలు ప్రారంభించారు. స్థానికుల సమాచారంతో స్థానిక పోలీసులు , ఆర్మీ అధికారులు ఘటన స్థలానికి చేరుకుని సహయక చర్యలు చేపట్టారు. గాయపడ్డ సైనికులను హుటాహుటిన ఆసుపత్రికి తరలించారు. ఈ ఘటనపై పోలీసులు విచారణ మొదలు పెట్టారు. ప్రమాదానికి గల కారణాలపై ఆరా తీస్తున్నట్లు అధికారులు వెల్లడించారు.
