బిజినెస్ డెస్క్, వెలుగు: విమాన ప్రయాణాలు మళ్లీ జోరందుకున్నాయి. ఈ ఏడాది మార్చి నెలలో మొత్తం 1.29 కోట్ల మంది విమాన ప్రయాణాలు చేస్తే, జనవరి–మార్చి క్వార్టర్లో 3.75 కోట్ల మంది విమాన ప్రయాణాలు చేశారు. డొమెస్టిక్ ఫ్లయిట్లలో ప్రయాణాలు ఇంతకు ముందు 2019 కేలండర్ ఇయర్ నాలుగో క్వార్టర్లో ఎక్కువగా సాగాయి. ఆ క్వార్టర్లో 3.81 కోట్ల మంది విమానాలలో ప్రయాణించారు. ఆ తర్వాత తాజా క్వార్టర్లో జరిగిన ప్రయాణాలే అత్యధికమని డైరెక్టర్ జనరల్ ఆఫ్ సివిల్ ఏవియేషన్(డీజీసీఏ) డేటా వెల్లడించింది. దేశీ విమానయాన కంపెనీలు ఓవైపు సవాళ్లు ఎదుర్కొంటున్నా, ఈ ఏడాది మొదటి క్వార్టర్ బెస్ట్ క్వార్టర్గా రికార్డవడం విశేషం. ఇండిగో, గో ఫస్ట్ కంపెనీల విమానాలు కొన్ని గ్రౌండ్కే పరిమితమయ్యాయి. గో ఫస్ట్కి చెందిన ఏ320 విమానాలన్నింటిలోనూ ప్రాట్ అండ్ విట్నీ ఇంజిన్లే ఉండగా, ఇండిగో విమానాలు కొన్నింటిలోనూ అవే ఇంజిన్లున్నాయి. ఈ ఇంజిన్లు బాగా సతాయిస్తున్న విషయం తెలిసిందే. మార్చి నెలలో ఇండిగో మార్కెట్ వాటా సగమైతే, ఇతర ఎయిర్లైన్స్ కంపెనీలేవీ పది శాతం వాటాను దాటలేకపోయాయి.
ఇండిగో లీడర్....
విమానాల సంఖ్య పరంగా అతి పెద్దదైన ఇండిగో డొమెస్టిక్ మార్కెట్లో 55.7 శాతం వాటాతో 2023 కేలండర్ ఇయర్ మొదటి క్వార్టర్లో టాప్ ప్లేస్లో నిలిచింది. ఈ ఎయిర్లైన్ మార్చి నెలలో ఏకంగా 73.17 లక్షల మంది ప్రయాణీకులను మోసుకెళ్లింది. ఒక నెలలో 70 లక్షల మంది ప్రయాణీకుల మార్కును అందుకోవడం ఈ కంపెనీకి ఇదే మొదటిసారి. కొన్ని విమానాలు గ్రౌండ్కే పరిమితమైనా, మిగిలిన విమానాలను సమర్ధంగా ఉపయోగించుకుంటూ తన వాటా పెంచుకుంది ఇండిగో. అంతకు ముందు కొన్ని నెలల పాటు నెంబర్ 2 పొజిషన్లోకి వచ్చిన ఎయిర్ ఇండియా మార్చి నెలలో మూడో ప్లేస్కి జారిపోయింది. విస్తారా ఎయిర్లైన్ ఈ కంపెనీని వెనక్కి నెట్టి రెండో ప్లేస్లో నిలిచింది. టాటా గ్రూప్లోని మూడు ఎయిర్లైన్స్ కంపెనీలకు కలిపి ఇప్పుడు 25.1 శాతం వాటా ఉంది. ఆ గ్రూప్ పెట్టుకున్న టార్గెట్30 శాతం కంటే ఇది కొంచెమే తక్కువ. నిజానికి కెపాసిటీ ఎయిర్ ఇండియాకే ఎక్కువ ఉన్నప్పటికీ, ఎక్కువ లోడ్ ఫ్యాక్టర్తో విస్తారా ముందంజలో ఉంది.
కిందకి జారుతున్న గో ఫస్ట్, స్పైస్జెట్...
గతంలో రెండో పెద్ద ప్లేయర్గా నిలిచిన స్పైస్జెట్ వేగంగా కిందకి జారిపోతోంది. ఈ ఏడాది మార్చిలోను, మొదటి క్వార్టర్లోనూ కూడా మార్కెట్ వాటా పరంగా ఆరో ప్లేస్లో ఈ ఎయిర్లైన్ నిలిచింది. ఇక గో ఫస్ట్ మార్కెట్ వాటా ఎయిర్ ఏషియా ఇండియా కంటే దిగువకు పడిపోయింది. కాకపోతే ఆశ్చర్యకరమైన విషయమేమంటే గో ఫస్ట్, స్పైస్ జెట్ ఎయిర్ లైన్స్ రెండూ మార్చి నెలలో హయ్యస్ట్ లోడ్ ఫ్యాక్టర్ సాధించాయి.