- అలకలు, అసంతృప్తి వీడిన నేతలు
- గెలుపే లక్ష్యంగా జోరుగా ప్రచారాలు
- గవర్నమెంట్ వస్తే పదవులు వస్తాయని ఆశ
నిజామాబాద్, వెలుగు: ఉమ్మడి జిల్లాలో అత్యధిక స్థానాలను కైవసం చేసుకోవాలనే లక్ష్యంతో కాంగ్రెస్ పార్టీ లీడర్లు పనిచేస్తున్నారు. ఆయా స్థానాల్లో టికెట్లు ఆశించి భంగపడ్డ లీడర్లు కొన్ని రోజులు అలకబూనినా.. పార్టీ అధికారంలోకి వస్తే తమకు భవిష్యత్ ఉంటుందని భావించి క్యాండిడేట్లకు మద్దతుగా నిలుస్తున్నారు. ఒకరిద్దరు తప్పితే లీడర్లంతా అభ్యర్థుల విజయానికి ఉమ్మడి కృషి చేస్తూ ఐక్యరాగం ఆలపిస్తున్నారు.
పార్టీ గెలుపే ముఖ్యం..
అర్బన్ సెగ్మెంట్ నుంచి బరిలో నిలిచి తమ సత్తా చాటాలని ముఖ్యమైన లీడర్లు భావించారు. మైనార్టీ నేత తాహెర్, మాజీ మేయర్ధర్మపురి సంజయ్, టీపీసీసీ వైస్ ప్రెసిడెంట్ కేశవేణు తదితరులు టికెట్ఆశించారు. ఇటీవల బీఆర్ఎస్ను వీడి కాంగ్రెస్ లో చేరిన ఎమ్మెల్సీ ఆకుల లలిత సైతం టికెట్ కోసం ప్రయత్నించారు. ఇక్కడ మైనార్టీ ఓటర్లు అధికంగా ఉన్న నేపథ్యంలో పార్టీ అనూహ్యంగా మాజీ మంత్రి, మైనార్టీ నేత షబ్బీర్అలీకి టికెట్ కేటాయించింది.
దీంతో నారాజ్కు లోనైన స్థానిక నేతలు త్వరగానే కోలుకొని షబ్బీర్ విజయం కోసం కృషి చేస్తున్నారు. తాహెర్, లలిత, సంజయ్, కేశవేణుతదితరులు షబ్బీర్తో కలిసి ప్రచారాల్లో పాల్గొంటున్నారు. రూరల్ టికెట్ఆశించి సాధ్యం కానందున మొదట్లో అలక వహించిన మార్కెట్కమిటీ మాజీ చైర్మన్నగేశ్రెడ్డి, అభ్యర్థి డాక్టర్ భూపతిరెడ్డి గెలుపు కోసం తీవ్రంగా శ్రమిస్తున్నారు.
మాజీ మంత్రి మండవ వెంకటేశ్వరరావు పరోక్షంగా అండగా నిలుస్తున్నారు. బాల్కొండ నియోజకవర్గంలో పోటీ ప్లాన్తో సరంజామా సిద్ధం చేసుకున్న డీసీసీ ప్రెసిడెంట్మానాల మోహన్రెడ్డి, కిసాన్ సంఘం స్టేట్ ప్రెసిడెంట్ అన్వేశ్రెడ్డి ఇప్పుడు పార్టీ అభ్యర్థి ముత్యాల సునీల్రెడ్డి గెలుపే లక్ష్యంగా పనిచేస్తున్నారు.
నో రెబల్స్..
ఆయా నియోజకవర్గాల్లో టికెట్లు దక్కని నేతలు రేబల్గా బరిలో నిలిచి పార్టీ అభ్యర్థుల విజయావకాశాలు దెబ్బతీస్తారని అంతా భావించారు. కానీ వారు అనూహ్యంగా తమ నామినేషన్లు విత్డ్రా చేసుకొని, పార్టీ క్యాండిడేట్ల విజయం కోసం కృషి చేస్తున్నారు. ఆర్మూర్ టికెట్ఆశించి భంగపడ్డ సర్పంచుల ఫోరం మాజీ అధ్యక్షుడు గోర్త రాజేందర్ నామినేషన్ దాఖలు చేశారు. ఓట్లు చీలి పార్టీకే నష్టం జరుగుతుందనే ఉద్దేశంతో నామినేషన్ విత్ డ్రా చేసుకొని, వినయ్రెడ్డి గెలుపు కోసం శ్రమిస్తున్నారు.
బాన్సువాడ టికెట్దక్కకపోవడంతో సూసైడ్అటెంప్ట్ చేసిన కాసుల బాల్రాజ్, ట్రీట్మెంట్తర్వాత కొలుకొని అభ్యర్థి ఏనుగు రవీందర్రెడ్డితో కలిసి ప్రచారంలో పాల్గొంటున్నారు. మూడుసార్లు జుక్కల్ ఎమ్మెల్యేగా గెలిచిన గంగారాంకు ఈ సారి పార్టీ టికెట్ దక్కలేదు. దీంతో అతడు ఇండిపెండెంట్గా బరిలో నిలిచేందుకు సిద్ధమయ్యారు. కార్యకర్తల సూచన మేరకు నామినేషన్విత్డ్రా చేసుకొని పార్టీ గెలుపు కోసం పనిచేయాలని నిర్ణయించుకున్నారు. ఎల్లారెడ్డిలో టికెట్ రాక ఆగ్రహంతో పార్టీ వీడిన సుభాష్రెడ్డి బీజేపీ నుంచి పోటీ చేస్తున్నారు. కానీ ఆయన క్యాడర్ లో చాలా మంది కాంగ్రెస్లోనే కొనసాగుతూ మదన్మోహన్ కోసం పని చేస్తున్నారు.
