యాదాద్రి, వెలుగు: ఎజెండా అంశాలపై ప్రతిపక్షాలు ఓటింగ్కు పట్టుబట్టడంతో భువనగిరి మున్సిపాలిటీ సాధారణ సమావేశం వాయిదా పడింది. మంగళవారం యాదాద్రి జిల్లా భువనగిరి మున్సిపాలిటీ సాధారణ సమావేశం నిర్వహించారు.బీజేపీ, కాంగ్రెస్ ఫ్లోర్ లీడర్లు మాయ దశరథ, పోత్నక్ ప్రమోద్కుమార్ మాట్లాడుతూ ఎజెండాపై ఫ్లోర్లీడర్ల మీటింగ్ఎందుకు పెట్టలేదని ప్రశ్నించారు. పైగా కొన్ని అంశాలకు కలెక్టర్ ఆమోదం అని పేర్కొనడంపై అభ్యంతరం వ్యక్తం చేశారు. కలెక్టర్ ఆమోదమే అనుకుంటే ఇక కౌన్సిలర్లు ఎందుకని ప్రశ్నించారు. కొత్తగా ఏర్పాటు చేసిన లైబ్రరీకి మున్సిపాలిటీ నుంచి రూ.5 లక్షలు మంజూరు చేయాలంటూ పేర్కొనడంపై అసంతృప్తి వ్యక్తం చేశారు. ప్రజల నుంచి వసూలు చేసిన టాక్స్తో వార్డుల్లో డెవలప్మెంట్ వర్క్స్ చేయాలని, లైబ్రరీకి ఖర్చు చేయాలంటే ప్రభుత్వం నుంచి వచ్చే పట్టణ ప్రగతి సహా ఇతర నిధులను ఖర్చు చేయాలని సూచించారు.
అదే విధంగా ఎజెండాలో పేర్కొన్న 54 అంశాలపై పూర్తిగా చర్చించాలన్నారు. ప్రతి అంశంపై ఓటింగ్ జరపాల్సిందేనని తేల్చి చెప్పారు. దీంతో అరకొర కౌన్సిలర్లతో నెట్టుకొస్తున్న అధికార పక్షం ఇరుకునపడింది. ఓటింగ్ నిర్వహిస్తే స్వపక్షంలో వ్యతిరేకంగా ఉన్న కౌన్సిలర్లతో పాటు ప్రతిపక్షాల కౌన్సిలర్లు వ్యతిరేకిస్తూ వీగిపోవడం ఖాయమని, మీటింగ్ నిర్వహించి పరువు పోగొట్టుకోవడం ఎందుకుని అధికార బీఆర్ఎస్ ఓ అంచనాకు వచ్చింది. దీంతో సమావేశాన్ని వాయిదా వేస్తున్నట్టు మున్సిపల్చైర్మన్ ఎనబోయిన ఆంజనేయులు ప్రకటించారు.
