- బీఆర్ఎస్కు కాంగ్రెస్ సహకరిస్తున్నది: రఘునందన్ రావు
- రిటర్నింగ్ అధికారికి కంప్లైంట్
మెదక్, వెలుగు: మాజీ మంత్రి హరీశ్ రావు కనుసన్నల్లోనే డబ్బుల పంపిణీ జరుగుతున్నదని మెదక్ లోక్సభ బీజేపీ అభ్యర్థి రఘునందన్ రావు ఆరోపించారు. లోక్సభ ఎన్నికల నేపథ్యంలో సెగ్మెంట్లో జరుగుతున్న డబ్బుల పంపిణీపై ఆదివారం ఆయన మెదక్ కలెక్టరేట్లో రిటర్నింగ్ అధికారికి కంప్లైంట్ చేశారు. తర్వాత ఆయన మీడియాతో మాట్లాడారు. ‘‘శనివారం సాయంత్రం నుంచి హరీశ్ రావు ఆదేశాల మేరకు సిద్దిపేట, దుబ్బాక, గజ్వేల్, పటాన్చెరు అసెంబ్లీ నియోజకవర్గాల్లో ఒక్కో ఓటుకు రూ.500 నుంచి రూ.1,000 చొప్పున పంచుతున్నరు.
ఎన్నికల్లో ఓడిపోతామనే భయంతోనే ఇలా డబ్బులు పంచుతున్నరు. హరీశ్కు మంత్రి పొంగులేటి శ్రీనివాస్ రెడ్డి హెల్ప్ చేస్తున్నడు. బీఆర్ఎస్ అభ్యర్థి తరఫున విచ్చలవిడిగా డబ్బులు పంచుతున్నడు. మాజీ సర్పంచ్లు, బీఆర్ఎస్ లీడర్లను పిలిపించుకుని డబ్బులు పంపిణీ చేస్తున్నడు. ఈ విషయం ఎస్ఐలు, సీఐలు, డీఎస్పీలు, ఎస్పీ, సీపీలకు చెప్పినా పట్టించుకోవడం లేదు’’అని అన్నారు.
15 కార్లు ఎవరివో ఎంక్వైరీ చేయాలి
శనివారం రాత్రి చేగుంట మండలం పెద్దశివనూర్, చిన్న శివనూర్ ఫామ్హౌస్లోకి బీఆర్ఎస్ లీడర్లు 15 కార్లలో వచ్చారని, ఈ విషయాన్ని పోలీసు ఉన్నతాధికారులకు చెప్పినా వెంటనే స్పందించలేదని రఘునందన్ అన్నారు. తాము కంప్లైంట్ చేసిన రెండు గంటల తర్వాత పోలీసులు వెళ్లడంపై అనుమానాలున్నాయని చెప్పారు. ‘‘ఒక కారు ఆపి చెక్ చేస్తే రూ.88లక్షలు దొరికాయని పోలీసులు చెప్తున్నరు. అక్కడ దొరికిన కవర్లలో ఏ బూత్కు.. ఎన్ని డబ్బులు పంచాలన్నది స్పష్టంగా రాసి ఉన్నది. సీసీ టీవీ ఫుటేజీ ఆధారంగా అక్కడకు వచ్చిన 15 కార్లు ఎవరివో ఎంక్వైరీ చేయాలి.
ఈ విషయమై రిటర్నింగ్ ఆఫీసర్లకు, జనరల్ అబ్జర్వర్కు, ఎస్పీకి ఫిర్యాదు చేశాం. ఎలక్షన్ కమిషన్ ఆఫ్ ఇండియాకు కూడా ఫిర్యాదు చేస్తాం. మెదక్ ఎంపీగా నేను గెలుస్తున్నా అని తెలిసే కాంగ్రెస్, బీఆర్ఎస్ కలిసి దొంగా.. పోలీస్ ఆట ఆడుతున్నాయి’’అని అన్నారు. బీఆర్ఎస్ లీడర్లు ఎన్ని కుట్రలు చేసినా.. కాంగ్రెస్తో కుమ్మక్కైనా బీజేపీని ఓడించలేరని చెప్పారు. ఈవీఎంలు స్ట్రాంగ్ రూమ్కు తీసుకెళ్లేదాకా బీజేపీ కార్యకర్తలు సంయమనం పాటించాలని సూచించారు.
