కలకత్తా: బెంగాల్ అసెంబ్లీ ఉపఎన్నికలకు బీజేపీ అభ్యర్థులను ప్రకటించింది. ముఖ్యమంత్రి మమతా బెనర్జీ పోటీ చేస్తున్న భవానీపూర్ నియోజకవర్గంలో లాయర్ ప్రియాంక టిబ్రివాల్ను బీజేపీ బరిలోకి దించింది. ప్రియాంక వృత్తిరిత్యా లాయర్. ఆమె సుప్రీంకోర్టులోనూ మరియు కలకత్తా హైకోర్టులోనూ లాయర్ ప్రాక్టీస్ చేసింది. ప్రియంక కలకత్తాలో జన్మించి.. స్కూలింగ్ అంతా అక్కడే చేసింది. ఆ తర్వాత ఢిల్లీలో గ్రాడ్యుయేషన్ పూర్తిచేసి.. తిరిగి కలకత్తాకు వచ్చి హజ్రా కాలేజీ నుంచి తన ‘లా’ను పూర్తిచేసింది. ప్రియాంక 2014లో బీజేపీలో చేరి.. ప్రస్తుతం బీజేవైఎం వైస్ ప్రెసిడెంట్గా బాధ్యతలు నిర్వర్తిస్తోంది. ప్రియాంక 2021లో జరిగిన ఎన్నికల్లో ఎంటల్లి నియోజకవర్గం నుంచి ఎమ్మెల్యేగా పోటీచేసింది. ఆ ఎన్నికల్లో టీఎంసీ అభ్యర్థి స్వర్ణ కమల్ సాహా చేతిలో ఓడిపోయింది. గతంలో 2015 మున్సిపల్ ఎన్నికల్లోనూ పోటీచేసి టీఎంసీ అభ్యర్థి చేతిలో పరాజయం పాలైంది. ప్రియాంక ప్రస్తుతం 2021 ఎన్నికల సందర్భంగా బెంగాల్లో జరిగిన ఘర్షణల కేసును వాదిస్తోంది.
ప్రియాంకతో పాటు మరికొంతమంది అభ్యర్థులను బీజేపీ ప్రకటించింది. జంగీపూర్ నుంచి సుజిత్ దాస్, శంశేర్ గంజ్ నుంచి మిలన్ ఘోష్లను బరిలోకి దింపుతోంది. ఈ స్థానాలకు ఈ నెల 30న పోలింగ్ జరగనుండగా.. అక్టోబర్ 3న ఓట్ల లెక్కింపు కానుంది.
