కాళేశ్వరంపై బహిరంగ విచారణకు సిద్ధమా?

తప్పుచేస్తే ఎలాంటి విచారణకైనా సిద్ధమనే సీఎం కేసీఆర్ కాళేశ్వరం ప్రాజెక్టుపై బహిరంగ విచారణకు  సిద్ధమా అని బీజేపీ అధికార ప్రతినిధి రఘునందన్​రావు సవాల్​ విసిరారు. ‘దండం బెట్టి దరఖాస్తు ఇస్తున్నాం.. నిజాయితీని నిరూపించుకోవాలి’ అని స్పష్టం చేశారు. సోమవారం  ఆయన మీడియాతో మాట్లాడుతూ..  కాళేశ్వరం ప్రాజెక్టులో జులై 1 నుంచి ఎత్తిపోతలు ప్రారంభమవుతాయని చెప్పి ఆగమేఘాల మీద కన్నెపల్లి వద్ద గత నెలలో సీఎం కేసీఆర్ ప్రారంభోత్సవం చేశారని, కన్నెపల్లిలోని 11 పంపుల్లో కనీసం ఒక్క పంపైనా ఇప్పుడు పని చేస్తున్నదా అని ప్రశ్నించారు. సుందిళ్ల, అన్నారం, కన్నెపల్లి పంప్​హౌస్​ల నిర్మాణంలో మెగా ఇంజనీరింగ్​ సంస్థ భారీ కుంభకోణానికి పాల్పడిందని ఆరోపించారు. ఆయా చోట్ల మొత్తం రూ. 150 కోట్లతో ఖర్చయ్యే పంపుల పనిని, రూ. 1800 కోట్లకు చేశారని మండిపడ్డారు. ప్రాజెక్టు నిర్మాణంలో పొరపాట్లను రిటైర్డ్ ఇంజనీర్ అధికారులు సీఎం కేసీఆర్​ దృష్టికి తెచ్చినా పట్టించుకోలేదని అన్నారు. 2005-–06లో వంద కోట్ల టర్నోవర్‌‌  లేని మెగా ఇంజనీరింగ్ సంస్థ రూ. 30 వేల కోట్లకు ఎదిగిందని, కేసీఆర్​ అధికార దుర్వినియోగం వల్లే ఆ సంస్థ అలా ఎదిగిందని ఆరోపించారు. రిటైర్డు ఇంజనీర్లతో కలిసి బీజేపీ బహిరంగ విచారణకు సిద్ధంగా ఉందని, ఇందుకు టీఆర్​ఎస్​ సిద్ధమా అని ప్రశ్నించారు. తప్పుచేస్తే ఎలాంటి విచారణకైనా సిద్ధమనే కేసీఆర్కా..  సీబీఐ విచారణకు సిద్ధమా అని సవాల్​ విసిరారు. సీఎం స్పందించకపోతే కాళేశ్వరం ప్రాజెక్టు అవకతవకలపై సీబీఐతో విచారణ జరపాలని ప్రధానిని కోరుతామని రఘునందన్​రావు స్పష్టం చేశారు.