- రూ.700 కోట్ల లాభాలు పంచుతం
- ఐదేండ్లలో 12 కొత్త గనులు ప్రారంభిస్తం
భద్రాద్రి కొత్తగూడెం, వెలుగు: సింగరేణి కార్మికులకు లాభాల బోనస్ కింద త్వరలో రూ.700 కోట్లు చెల్లించనున్నట్లు ఆ సంస్థ సీఎండీ శ్రీధర్ తెలిపారు. హైదరాబాద్లోని సింగరేణి భవన్ లో నిర్వహించిన స్వాతంత్ర్య వేడుకల్లో భాగంగా ఆయన జాతీయ జెండాను మంగళవారం ఎగురవేశారు. పలువురు ఉత్తమ అధికారులను సన్మానించారు. ఈ సందర్భంగా సీఎండీ మాట్లాడుతూ.. వచ్చే ఐదేండ్లలో 12 కొత్త మైన్స్ ప్రారంభించేందుకు ఏర్పాట్లు చేస్తున్నామన్నారు.
100మిలియన్ టన్నుల బొగ్గు ఉత్పత్తి, రూ.50 వేల కోట్ల టర్నోవర్ సాధించేందుకు ప్రణాళికలు రూపొందిస్తున్నామన్నారు. పోటీ మార్కెట్లో నిలబడాలంటే ఖర్చులు తగ్గించి, ఉత్పాదకత పెంచాల్సిన అవసరం ఉందన్నారు. సీఎం కేసీఆర్ సారథ్యంలో 9 ఏండ్లలో దేశంలోని ఏ ప్రభుత్వ రంగ సంస్థ సాధించని టర్నోవర్ ను, లాభాలను సాధించిందన్నారు. తెలంగాణ రాక ముందు కార్మికులకు రూ .83 కోట్ల లాభాల బోనస్గా చెల్లించగా.. ఈ ఏడాది రూ.700 కోట్ల లాభాల బోనస్ను దసరా పండుగకు ముందే పంపిణీ చేస్తామన్నారు.
2029–-30 నాటికి సింగరేణి వంద మిలియన్ టన్నుల బొగ్గు ఉత్పత్తి మైలు రాయి దాటుతుందని ధీమా వ్యక్తం చేశారు. అనంతరం జీఎం(కో ఆర్డినేషన్) ఎం.సురేశ్ను సన్మానించి ఆయన సేవలను కొనియాడారు. కార్యక్రమంలో అడ్వైజర్లు డి.ఎన్.ప్రసాద్(మైనింగ్), సురేంద్ర పాండే(ఫారెస్ట్రీ), ఈడీ(కోల్ మూమెంట్) జె.అల్విన్, జీఎం(కో ఆర్డినేషన్) ఎం.సురేశ్, జీఎం(మార్కెటింగ్) జి.దేవేందర్, అడ్వైజర్ (లా) లక్ష్మణ్రావు, సీఎంవో ఏఐ జనరల్ సెక్రెటరీ ఎన్.వి.రాజశేఖరరావు పాల్గొన్నారు.
