పాలకుర్తి(దేవరుప్పుల), వెలుగు: రాజకీయ పార్టీల నాయకుల కోసం కాకుండా.. పంటలకు అందించే సాగునీటి కోసం సీఎం రేవంత్రెడ్డి గేట్లు తెరవాలని బీఆర్ఎస్ నేత, మాజీ మంత్రి హరీశ్ రావు అన్నారు. ఆదివారం జనగామ జిల్లా దేవరుప్పుల మండలం చింతబాయి తండాలో ఎండిపోయిన వరి పొలాలను మాజీ మంత్రులు ఎర్రబెల్లి దయాకర్రావు, సత్యవతి రాథోడ్తో కలిసి ఆయన పరిశీలించారు. ఈ సందర్భంగా హరీశ్ మాట్లాడుతూ.. నీళ్లు లేక పంటలు ఎండిపోయిన రైతులందరికీ వెంటనే ఎకరానికి రూ. 25 వేల చొప్పున నష్టపరిహారం ఇవ్వాలని డిమాండ్ చేశారు.
సీఎం రేవంత్రెడ్డి, మంత్రులు హైదరాబాద్లో రాజకీయాలు మానుకుని పొలాలకు వచ్చి రైతులకు ఆత్మవిశ్వాసం కల్పిస్తే బాగుంటుందని చెప్పారు. ‘‘కాంగ్రెస్ ప్రభుత్వం ఏర్పడ్డాక ఇప్పటికే రాష్ర్టంలో180 మంది రైతులు ఆత్మహత్యలు చేసుకున్నారు. రైతులు చనిపోతుంటే కనీసం పరామర్శించడానికి వెళ్లని సీఎం.. బీఆర్ఎస్ ఎమ్మెల్యేలను కాంగ్రెస్లో చేర్చుకోవడానికి మాత్రం వాళ్ల ఇండ్ల చుట్టూ తిరుగుతున్నారు” అని హరీశ్ రావు ఆరోపించారు. పొలాలను పరిశీలించినవారిలో ఎమ్మెల్యే కడియం శ్రీహరి, మాజీ ఎమ్మెల్యే పెద్ది సుదర్శన్ రెడ్డి, జడ్పీటీసీ పల్లా సుందర్ రాంరెడ్డి, ఎంపీపీ బస్వ మల్లేశ్ సావిత్రి తదితరులు ఉన్నారు.
