- యువత, మహిళలు పాలిటిక్స్లో రావాలి: ఎమ్మెల్సీ కవిత
హైదరాబాద్, వెలుగు: యువత, మహిళలకు తెలంగాణ జాగృతిని రాజకీయ శిక్షణా వేదికగా మారుస్తామని జాగృతి అధ్యక్షురాలు, బీఆర్ఎస్ ఎమ్మెల్సీ కవిత అన్నారు. రాజకీయ నేపథ్యంలేని వారికి వేదికగా నిలుస్తుందని తెలిపారు. యువత పాలిటిక్స్లోకి వస్తేనే స్వచ్ఛమైన రాజకీయాలకు నాంది పడుతుందని చెప్పారు. తెలంగాణ జాగృతి ఆధ్వర్యంలో ‘లీడర్’ పేరిట కార్యక్రమాన్ని నిర్వహిస్తామని తెలిపారు. కవిత తన నివాసంలో ఆదివారం ‘లీడర్’ పోస్టర్ను ఆవిష్కరించి మాట్లాడారు. తెలంగాణ గడ్డ అంటేనే ప్రశ్నించేతత్వం అని అన్నారు. అది తనతోనే ఆగొద్దని, ముందు తరాలకూ ప్రశ్నించేతత్వాన్ని నేర్పించాలని తెలిపారు.
రాష్ట్రవ్యాప్తంగా 3 రోజులపాటు ట్రైనింగ్ క్లాసులు నిర్వహిస్తామన్నారు. ఈ కార్యక్రమాన్ని జులైలో ప్రారంభిస్తామని చెప్పారు. ఆగస్టు నుంచి జిల్లాల్లో ప్రతి నెలా నిర్వహించేందుకు సిద్ధమవుతున్నట్లు తెలిపారు. ప్రజా సమస్యలను గుర్తించడం, వాటిని పరిష్కరించడం, అభివృద్ధికి నిధులు సాధించడం వంటి అంశాలపై ట్రైనింగ్ ఇస్తున్నట్లు వివరించారు. విద్యార్థులు తమ పవర్ను చూపించాల్సిన అవసరం ఉందని తెలిపారు.
